@3. sineho. 4. nissinehabhāvo. 5. sineho. Na vaṭṭati. Tato hi ekaṃ siṭṭhaṃpi ajjhoharato pācittiyameva.
Akappiyamaṃsesu manussamaṃse thullaccayena saddhiṃ pācittiyaṃ. Avasesesu dukkaṭena saddhiṃ. Yāmakālikaṃ sati paccaye ajjhoharato pācittiyaṃ. Āhāratthāya ajjhoharato dukkaṭena saddhiṃ pācittiyaṃ. Sace pavārito hutvā anatirittaṃ kataṃ ajjhoharati pakatiāmise dve pācittiyāni. Manussamaṃse thullaccayena saddhiṃ dve. Sese akappiyamaṃse dukkaṭena saddhiṃ. Yāmakālikaṃ sati paccaye sāmisena mukhena ajjhoharato dve. Nirāmisena ekameva. Āhāratthāya ajjhoharato vikappadvayepi dukkaṭaṃ vaḍḍhati. Sace vikāle ajjhoharati pakatibhojane sannidhipaccayā ca vikālabhojanapaccayā ca dve pācittiyāni. Akappiyamaṃse thullaccayañca dukkaṭañca vaḍḍhati. Yāmakālikesu vikālabhojanapaccayā anāpatti. Anatirittapaccayā pana vikāle sabbavikappesu anāpatti. {255} Sattāhakālikaṃ yāvajīvikaṃ āhāratthāyāti āhāratthāya paṭiggaṇhato paṭiggahaṇapaccayā tāva dukkaṭaṃ. Ajjhoharato pana sace nirāmisaṃ hoti ajjhohāre ajjhohāre dukkaṭaṃ. Atha āmisasaṃsaṭṭhaṃ paṭiggahetvā ṭhapitaṃ hoti yathāvatthukaṃ pācittiyameva. {256} Anāpatti yāvakālikanti ādimhi vikālabhojanasikkhāpade niddiṭṭhaṃ khādanīyaṃ bhojanīyaṃ yāva majjhantikasaṅkhāto kālo tāva bhuñjitabbato yāvakālikaṃ saddhiṃ anulomapānehi aṭṭhavidhaṃ pānaṃ yāva rattiyā pacchimayāmasaṅkhāto yāmo tāva paribhuñjitabbato yāmo kālo assāti yāmakālikaṃ Sappiādi pañcavidhaṃ bhesajjaṃ sattāhaṃ nidhetabbato sattāhaṃ kālo assāti sattāhakālikaṃ ṭhapetvā udakaṃ avasesaṃ sabbaṃpi yāvajīvaṃ pariharitvā sati paccaye paribhuñjitabbato yāvajīvikanti vuccati.
Tattha aruṇodaye paṭiggahitaṃ yāvakālikaṃ satakkhattumpi nidahitvā yāva kālo nātikkamati tāva yāmakālikaṃ ekaṃ ahorattaṃ sattāhakālikaṃ sattarattaṃ itaraṃ sati paccaye yāvajīvaṃpi bhuñjantassa anāpatti. Sesamettha uttānameva. Aṭṭhakathāsu pana imasmiṃ ṭhāne pānakathā kappiyānulomakathā kappati nu kho yāvakālikena yāmakālikanti ādikathā ca kappiyabhūmikathā ca vitthāritā. Taṃ mayaṃ āgataṭṭhāneyeva kathayissāma. Eḷakalomasamuṭṭhānaṃ kāyato ca kāyacittato ca samuṭṭhāti kiriyā nosaññāvimokkhaṃ acittakaṃ paṇṇattivajjaṃ kāyakammaṃ ticittaṃ tivedananti.