Sāmaṇero bhattaṃ pacitukāmo taṇḍule dhovitvā niccāletuṃ na sakkoti. Bhikkhunā taṇḍule ca bhājanaṃ ca paṭiggahetvā taṇḍule dhovitvā niccāletvā bhājanaṃ uddhanaṃ āropetabbaṃ. Aggi na kātabbo. Pakkakāle vivaritvā pakkabhāvo jānitabbo. Sace duppakkaṃ hoti pākatthāya pidahituṃ na vaṭṭati. Rajassa vā chārikāya vā apatanatthāya vaṭṭati. Pakkakāle oropetuṃpi bhuñjituṃpi vaṭṭati. Tato paṭṭhāya puna paṭiggahaṇakiccaṃ natthi.

Sāmaṇero paṭibalo pacituṃ khaṇo panassa natthi katthaci gantukāmo bhikkhunā sataṇḍulodakaṃ bhājanaṃ paṭiggahetvā uddhanaṃ āropetvā aggiṃ jāletvā gacchāti vattabbo. Tato paraṃ purimanayeneva sabbaṃ kātuṃ vaṭṭati. Bhikkhu yāguatthāya suddhabhājanaṃ āropetvā udakaṃ tāpeti vaṭṭati. Tatte udake sāmaṇero taṇḍule pakkhipati. Tato paṭṭhāya pana bhikkhunā aggi na kātabbo. Pakkaṃ yāguṃ paṭiggahetvā pātuṃ vaṭṭati. Sāmaṇero yāguṃ pacati. Hatthakukkuccako bhikkhu kīḷanto bhājanaṃ āmasati pidhānaṃ āmasati uggataṃ pheṇuṃ chinditvā harati. Tasseva pātuṃ na vaṭṭati. Durupaciṇṇaṃ nāma hoti. Sace pana dabbiṃ vā uḷuṅkaṃ vā gahetvā anukkhipanto āluleti sabbesaṃ na vaṭṭati. Sāmapākañceva hoti durupaciṇṇaṃ ca. Sace ukkhipati uggahitakaṃpi hoti. Bhikkhunā piṇḍāya caritvā ādhārake patto ṭhapito Hoti. Tatra ce añño lolabhikkhu kīḷanto pattaṃ āmasati pattapidhānaṃ āmasati. Tasseva tato laddhabhattaṃ na vaṭṭati. Sace pana pattaṃ ukkhipitvā ṭhapeti sabbesaṃ na vaṭṭati. Tattha jātakaphalāni sākhāya vā valliyā vā gahetvā cāleti. Tasseva tato laddhaphalaṃ na vaṭṭati. Durupaciṇṇadukkaṭañca āpajjati. Phalarukkhaṃ pana apassayituṃ vā tattha kaṇṭake vā bandhituṃ vaṭṭati durupaciṇṇaṃ na hotīti mahāpaccariyaṃ vuttaṃ. Araññe patitaṃ pana ambaphalādiṃ disvā sāmaṇerassa dassāmīti āharitvā dātuṃ vaṭṭati. Sīhavighāsādiṃ disvā sāmaṇerassa dassāmīti paṭiggahetvā vā apaṭiggahetvā vā āharitvā dātuṃ vaṭṭati. Sace pana sakkoti vitakkaṃ sodhetuṃ tato laddhaṃ khādituṃpi vaṭṭati. Neva āmakamaṃsapaṭiggahaṇapaccayā na uggahitakapaccayā vajjaṃ phusati.