Mātāpitūnaṃ atthāya telādīni gahetvā gacchato antarāmagge byādhi uppajjati. Tato yaṃ icchati taṃ paṭiggahetvā paribhuñjituṃ vaṭṭati. Sace pana mūlepi paṭiggahitaṃ hoti puna paṭiggahaṇakiccaṃ natthi. Mātāpitūnaṃ atthāya taṇḍulaṃ āharitvā deti. Te tatoyeva yāguādīni sampādetvā tassa denti vaṭṭati. Sannidhipaccayā vā uggahitakapaccayā vā doso natthi. Bhikkhu pidahitvā udakaṃ tāpeti. Yāva parikkhayā paribhuñjituṃ vaṭṭati. Sace panettha chārikā patati paṭiggahetabbaṃ. Dīghasaṇḍāsena thālakaṃ gahetvā telaṃ pacantassa chārikā patati. Hatthena Amuñcanteneva pacitvā otāretvā paṭiggahetabbaṃ. Sace aṅgārāpi dārūni vā paṭiggahetvā ṭhapitāni mūlapaṭiggahaṇameva vaṭṭati. Bhikkhu ucchuṃ khādati. Sāmaṇero mayhaṃpi dethāti vadati. Ito chinditvā gaṇhāti vutto gaṇhāti. Avasesesu pana paṭiggahaṇakiccaṃ natthi. Guḷapiṇḍakaṃ khādantassāpi eseva nayo. Vuttokāsato chinditvā gahitāvasesaṃ hi ajahitapaṭiggahaṇameva hoti. Bhikkhu guḷaṃ bhājento paṭiggahetvā koṭṭhāse karoti. Bhikkhūpi sāmaṇerāpi āgantvā ekagahaṇeneva ekamekaṃ koṭṭhāsaṃ gaṇhanti. Gahitāvasesaṃ paṭiggahitakameva hoti. Sace lolasāmaṇero gaṇhitvā gaṇhitvā puna ṭhapeti tassa gahitāvasesaṃ apaṭiggahitakaṃ hoti. Bhikkhu dhūmavaṭṭiṃ paṭiggahetvā dhūmaṃ pivati. Mukhaṃ ca kaṇṭho ca manosilāya litto viya hoti . Yāvakālikaṃ bhuñjituṃ vaṭṭati. Yāvakālikena yāvajīvikasaṃsaggadoso natthi. Pattaṃ vā rajanaṃ vā pacantassa kaṇṇanāsamukhacchiddehi dhūmo pavisati byādhipaccayā pupphaṃ vā phalaṃ vā upasiṃghati. Abbohārikattā vaṭṭati. Bhuttuttāro tāluṃ āhacca antoyeva pavisati. Avisayattā vaṭṭati. Mukhapaviṭṭhaṃ puna ajjhoharato vikāle āpatti. Dantantare laggassa āmisassa raso pavisati āpattiyeva. Sace sukhumaṃ āmisaṃ hoti raso na paññāyati abbohārikapakkhaṃ bhajati. Upakaṭṭhe kāle nirudakaṭṭhāne bhattaṃ bhuñjitvā kakkāretvā dve tayo kheḷapiṇḍe pātetvā udakaṭṭhānaṃ gantvā Mukhaṃ vikkhāletabbaṃ. Paṭiggahetvā ṭhapitasiṅgaverādīnaṃ aṅkurā nikkhamanti. Puna paṭiggahaṇakiccaṃ natthi. Loṇe asati samuddodakena loṇakiccaṃ kātuṃ vaṭṭati. Paṭiggahetvā ṭhapitaṃ loṇodakaṃ loṇaṃ hoti loṇaṃ vā udakaṃ hoti. Ucchuraso phāṇitaṃ hoti phāṇitaṃ vā raso hoti. Mūlapaṭiggahaṇameva vaṭṭati. Himakarakā udakagatikāeva. Pārihārikena katakaṭṭhinā udakaṃ pasādenti taṃ abbohārikaṃ āmisena saddhiṃ vaṭṭati. Āmisagatikehi kapiṭṭhaphalādīhi pasāditaṃ purebhattameva vaṭṭati. Pokkharaṇīādīsu udakaṃ bahalaṃ hoti vaṭṭati. Sace pana mukhe ca hatthe ca laggati na vaṭṭati. Taṃ paṭiggahetvā paribhuñjitabbaṃ. Khettesu kasitaṭṭhāne bahalaṃ udakaṃ hoti paṭiggahetabbaṃ. Sace sanditvā kandarādīni pavisitvā nadiṃ pūreti vaṭṭati. Kakudhasobbhādayo honti rukkhato patitehi pupphehi sañchannodakā. Sace puppharaso na paññāyati paṭiggahaṇakiccaṃ natthi. Parittaṃ udakaṃ hoti raso paññāyati paṭiggahetabbaṃ. Pabbatakandarādīsu kāḷavaṇṇapaṇṇacchannaudakepi eseva nayo. Pānīyaghaṭe sareṇukāni vā savaṇṭakkhīrāni vā pupphāni pakkhittāni honti paṭiggahetabbaṃ. Pupphāni vā paṭiggahetvā pakkhipitabbāni. Pāṭalikamallikā pakkhittā honti vāsamattaṃ tiṭṭhati. Taṃ abbohārikaṃ dutiyadivasepi āmisena saddhiṃ vaṭṭati. Bhikkhunā ṭhapitapupphavāsitakapānīyato sāmaṇero pānīyaṃ gahetvā pītāvasesaṃ tattheva ākīrati paṭiggahetabbaṃ. Padumasarādīsu Udakaṃ santharitvā ṭhitaṃ pupphareṇuṃ ghaṭena vikkhambhetvā udakaṃ gahetuṃ vaṭṭati. Kappiyaṃ kāretvā paṭiggahetvā ṭhapitaṃ dantakaṭṭhaṃ hoti. Sace tassa rasaṃ pivitukāmo mūlapaṭiggahaṇameva vaṭṭati. Apaṭiggahetvā ṭhapitaṃ paṭiggahetabbaṃ. Ajānantassa rase paviṭṭhepi āpattiyeva. Acittakaṃ hi idaṃ sikkhāpadaṃ. Mahābhūtesu kiṃ vaṭṭati kiṃ na vaṭṭatīti. Khīrantāva vaṭṭati kappiyamaṃsakhīraṃ vā akappiyamaṃsakhīraṃ vā hotu pivantassa anāpatti. Assu kheḷo siṅghāṇikā muttaṃ karīsaṃ semhaṃ dantamalaṃ akkhigūthako kaṇṇagūthako sarīre uṭṭhitaloṇanti idaṃ sabbaṃ vaṭṭati. Yampanettha ṭhānato cavitvā patte vā hatthe vā patati taṃ paṭiggahetabbaṃ. Aṅgalaggaṃ paṭiggahitakameva. Uṇhapāyāsaṃ bhuñjantassa sedo aṅgulīanusārena ekābaddho hutvā pāyāse santiṭṭhati. Piṇḍāya vā carantassa hatthato pattassa mukhavaṭṭiṃ gato pattatalaṃ orohati. Ettha paṭiggahaṇakiccaṃ natthi. Jhāmakamahābhūte idaṃ nāma na vaṭṭatīti natthi. Dujjhāpitaṃ pana na vaṭṭati. Sujjhāpitaṃ pana manussaṭṭhiṃpi cuṇṇaṃ katvā lehe upanetuṃ vaṭṭati. Cattāri mahāvikaṭāni asati kappiyakārake sāmaṃpi gahetvā paribhuñjituṃ vaṭṭati. Ettha ca dubbacopi asamatthopi kappiyakārako asantapakkheyeva tiṭṭhati. Chārikāya asati sukkhadāruṃ jhāpetvā chārikā gahetabbā. Sukkhadārumhi asati alladāruṃ rukkhato chinditvāpi kātuṃ vaṭṭati. Idaṃ pana catubbidhaṃpi mahāvikaṭaṃ kāloddissaṃ nāma sappadaṭṭhakkhaṇeyeva Vaṭṭati. Sesamettha uttānameva.