{454} Pañcamasikkhāpade. Talasattikaṃ uggirantīti pahāradānākāraṃ

Dassento kāyaṃpi kāyapaṭibaddhaṃpi uccārenti. Te pahārasamuccitā rodantīti te pahāraparicitā pubbepi laddhappahārattā idāni pahāraṃ dassantīti maññamānā rodantīti attho. Pahārassa mucchitātipi sajjhāyanti. Tattha pahārassa bhītāti attho. {457} Uggirati āpatti pācittiyassāti ettha sace uggiritvā viraddho pahāraṃ deti. Avassaṃ dhāretuṃ asakkontassa pahāro sahasā patati nappaharitukāmatāya dinnattā dukkaṭaṃ. Tena pahārena hatthādīsu yaṅkiñci bhijjati dukkaṭameva. Pahāritukāmassa yena kenaci daṇḍādinā pahāro vā mokkhito attanā vā satiṃ paṭilabhitvā na paharati dukkaṭaṃ. Paharantassa kenaci vā hattho dhārito dukkaṭaṃ.

{458} Mokkhādhippāyo talasattikaṃ uggiratīti ettha pubbe vuttesu vatthūsu purimanayeneva talasattikaṃ uggirantassa anāpatti. Sacepi virajjhitvā pahāraṃ deti anāpattiyeva. Sesaṃ purimasadisameva saddhiṃ samuṭṭhānādīhīti.

Talasattikasikkhāpadaṃ pañcamaṃ.