{515} Tena samayenāti aññātakaviññattisikkhāpadaṃ. Tattha upanando sakyaputtoti asītisahassamattānaṃ sakyakulā pabbajitānaṃ bhikkhūnaṃ paṭikiṭṭho lolajātiko. Paṭṭhoti cheko samattho paṭibalo sarasampanno kaṇṭhamādhuriyena samannāgato. Kismiṃ viyāti kiṃsu viya kileso viya hirottappavasena kampanaṃ viya saṅkampanaṃ viya hotīti attho. Addhānamagganti addhānasaṅkhātaṃ dīghamaggaṃ na nagaravīthimagganti attho. Te bhikkhū acchindiṃsūti musiṃsu pattacīvarāni nesaṃ hariṃsūti attho. Anuyuñjāhīti bhikkhubhāvaṃ jānanatthāya puccha. Anuyuñjiyamānāti pabbajjā upasampadā pattacīvarādhiṭṭhānādīni pucchiyamānā. Etamatthaṃ ārocesunti bhikkhubhāvaṃ jānāpetvā yvāyaṃ sāketā sāvatthiṃ addhānamaggaṃ paṭipannāti ādinā nayena vutto etamatthaṃ ārocesuṃ.

{517} Aññātakaṃ gahapatiṃ vāti ādīsu yaṃ parato tiṇena vā paṇṇena vā paṭicchādetvāti vuttaṃ taṃ ādiṃ katvā evaṃ anupubbīkathā veditabbā. Sace core passitvā daharā pattacīvarāni gahetvā palātā corā therānaṃ nivāsanapārupanamattaṃyeva haritvā gacchanti therehi neva tāva cīvaraṃ viññāpetabbaṃ. Na sākhāpalāsaṃ bhañjitabbaṃ. Atha daharā sabbaṃ bhaṇḍikaṃ chaḍḍetvā palātā corā therānaṃ nivāsanapārupanaṃ tañca bhaṇḍikaṃ haritvā Gacchanti daharehi āgantvā attano nivāsanapārupanāni na tāva therānaṃ dātabbāni. Na hi anacchinnacīvarā attano atthāya sākhāpalāsaṃ bhañjituṃ labhanti. Acchinnacīvarānaṃ pana atthāya labhanti. Acchinnacīvarā ca attanopi paresaṃpi atthāya labhanti. Tasmā therehi sākhāpalāsaṃ bhañjitvā vākādīhi gaṇṭhitvā daharānaṃ dātabbaṃ daharehi vā therānaṃ atthāya bhañjitvā gaṇṭhitvā tesaṃ hatthe datvā vā adatvā vā attanā nivāsetvā attano nivāsanapārupanāni therānaṃ dātabbāni. Neva bhūtagāmapātabyatāya pācittiyaṃ hoti na tesaṃ dhāraṇe dukkaṭaṃ. Sace antarāmagge rajakattharaṇaṃ vā hoti aññe vā tādise manusse passanti cīvaraṃ viññāpetabbaṃ. Yāni ca nesaṃ te vā manussā aññe vā sākhāpalāsanivāsane bhikkhū disvā ussāhajātā vatthāni denti tāni sadasāni vā hontu adasāni vā nīlādinānāvaṇṇāni vā kappiyānipi akappiyānipi sabbāni acchinnacīvaraṭṭhāne ṭhitattā tesaṃ nivāsetuñca pārupituñca vaṭṭanti. Vuttaṃpi hetaṃ parivāre