Sekhiyakaṇḍavaṇṇanā

yāni sikkhitasikkhena sekhiyānīti tādinā

bhāsitāni ayaṃ dāni tesaṃpi vaṇṇanākkamoti.

{576} Tattha parimaṇḍalanti samantato maṇḍalaṃ. Nābhimaṇḍalaṃ jānumaṇḍalanti uddhaṃ nābhimaṇḍalaṃ adho jānumaṇḍalaṃ paṭicchādentena jānumaṇḍalassa heṭṭhā jaṅghaṭṭhikato paṭṭhāya aṭṭhaṅgulamattaṃ nivāsanaṃ otāretvā nivāsetabbaṃ. Tato paraṃ otārentassa dukkaṭanti vuttaṃ. Yathānisinnassa jānumaṇḍalato heṭṭhā caturaṅgulamattaṃ paṭicchannaṃ hotīti mahāpaccariyaṃ vuttaṃ. Evaṃ nivāsentassa pana nivāsanaṃ pamāṇikaṃ vaṭṭati. Tatrīdaṃ pamāṇaṃ dīghaso muṭṭhipañcamaṃ tiriyaṃ aḍḍhateyyahatthaṃ tādisassa pana alābhena tiriyaṃ dvihatthappamāṇaṃpi vaṭṭati jānumaṇḍalapaṭicchādanatthaṃ nābhimaṇḍalaṃ pana cīvarenāpi sakkā paṭicchādetunti. Tattha ekapaṭṭacīvaraṃ evaṃ nivatthaṃpi ṭhāne na tiṭṭhati dupaṭṭaṃ pana tiṭṭhati. Olambanto nivāseti āpatti dukkaṭassāti ettha na kevalaṃ purato ca pacchato ca olambetvā nivāsentasseva dukkaṭaṃ ye panaññepi tena kho pana samayena chabbaggiyā bhikkhū gihinivatthaṃ nivāsenti hatthisoṇḍakaṃ macchavālakaṃ catukkaṇṇakaṃ tālavaṇṭakaṃ satavalikaṃ nivāsentītiādinā nayena khandhake nivāsanadosā vuttā tathā