Nivāsentassāpi dukkaṭameva. Te sabbe vuttanayeneva parimaṇḍalaṃ nivāsentassa na hontīti ayamettha saṅkhepo. Vitthāro pana tattheva āvibhavissati. Asañciccāti purato vā pacchato vā olambetvā nivāsessāmīti evaṃ asañcicca athakho parimaṇḍalaṃyeva nivāsessāmīti virajjhitvā aparimaṇḍalaṃ nivāsentassa anāpatti. Asatiyāti aññāvihitassāpi tathā nivāsentassa anāpatti. Ajānantassāti ettha nivāsanavattaṃ ajānantassa mokkho natthi. Nivāsanavattaṃ hi sādhukaṃ uggahetabbaṃ. Tassa anuggahaṇamevassa anādariyaṃ. Taṃ pana sañcicca anuggaṇhantasseva yujjati. Tasmā uggahitavattopi yo āruḷhabhāvaṃ vā oruḷhabhāvaṃ vā na jānāti tassa anāpatti. Kurundiyaṃ pana parimaṇḍalaṃ nivāsetuṃ ajānantassa anāpattīti vuttaṃ. Yo pana sukkhajaṅgho vā mahāpiṇḍikamaṃso vā hoti tassa sāruppatthāya jānumaṇḍalato aṭṭhaṅgulādhikaṃpi otāretvā nivāsetuṃ vaṭṭati. Gilānassāti jaṅghāya vā pāde vā vaṇo hoti ukkhipitvā vā otāretvā vā nivāsetuṃ vaṭṭati. Āpadāsūti bāḷamigā vā corā vā anubandhanti evarūpāsu āpadāsu anāpatti. Sesamettha uttānameva. Paṭhamapārājikasamuṭṭhānaṃ kiriyā saññāvimokkhaṃ sacittakaṃ lokavajjaṃ kāyakammaṃ akusalacittaṃ dukkhavedananti. Pussadevatthero sacittakaṃ paṇṇattivajjaṃ tivedananti āha. Upatissatthero pana anādaraṃ paṭicca vuttattā lokavajjaṃ
Akusalacittaṃ dukkhavedananti āha. {577} Parimaṇḍalaṃ pārupitabbanti tena kho pana samayena chabbaggiyā bhikkhū gihipārutaṃ pārupantīti evaṃ vuttaṃ anekappakāraṃ gihipārutaṃ apārupitvā idha vuttanayeneva ubho kaṇṇe samaṃ katvā pārupanavattaṃ pūrentena parimaṇḍalaṃ pārupitabbaṃ. Imāni ca dvepi sikkhāpadāni avisesena vuttāni. Tasmā vihārepi antaragharepi parimaṇḍalameva nivāsetabbaṃ ca pārupitabbañcāti. Samuṭṭhānādīni paṭhamasikkhāpade vuttanayeneva saddhiṃ theravādena. {578} Kāyaṃ vivaritvāti jānuṃpi uraṃpi vivaritvā. Supaṭicchannenāti na sīsaṃ pārutena athakho kaṇṭhikaṃ paṭimuñcitvā ubhato anuvātantena gīvaṃ paṭicchādetvā ubho kaṇṇe samaṃ katvā paṭisaṃharitvā yāva maṇibandhanā paṭicchādetvā antaraghare gantabbaṃ. Tatiyasikkhāpade. Galavāṭakato paṭṭhāya sīsaṃ maṇibandhato paṭṭhāya hatthe piṇḍikamaṃsato paṭṭhāya pāde vivaritvā nisīditabbaṃ.