{606} Sakkaccanti etthāpi asakkaccaṃ paṭiggahaṇeyeva āpatti. Paṭiggahitaṃ pana paṭiggahitameva. Sakkaccanti ca pattasaññīti ca ubhayaṃ vuttanayameva. {608} Sapadānanti tattha tattha odhiṃ akatvā anupaṭipāṭiyā. Samasūpake vattabbaṃ vuttanayameva. {610} Thūpatoti matthakato vemajjhatoti attho. {611} Paṭicchādetvā dentīti māghātasamayādīsu paṭicchannaṃ byañjanaṃ katvā denti. Viññattiyaṃ vattabbaṃ natthi.

{614} Ujjhānasaññisikkhāpadepi gilāno na muccati. {615} Nātimahanto kavaḷoti mayuraṇḍaṃ atimahantaṃ kukkuṭaṇḍaṃ atikhuddakaṃ tesaṃ vemajjhappamāṇo. Khajjaketi ettha mūlakhādanīyādi sabbaṃ gahetabbaṃ.

Catuttho vaggo.