Kathāyeva natthi.
Aparepi cattāro paribhogā lajjiparibhogo alajjiparibhogo dhammiyaparibhogo adhammiyaparibhogoti. Tattha alajjino lajjinā saddhiṃ paribhogo vaṭṭati. Āpattiyā na kāretabbo. Lajjino alajjinā saddhiṃ yāva na jānāti tāva vaṭṭati. Ādito paṭṭhāya hi alajjī nāma natthi. Tasmā yadāssa alajjibhāvaṃ jānāti tadā vattabbo tumhe kāyadvāre ca vacīdvāre ca vītikkamaṃ karotha taṃ apaṭirūpaṃ mā evaṃ akaritthāti. Sace anādayitvā karotiyeva yadi tena saddhiṃ paribhogaṃ karoti sopi alajjīyeva hoti. Yopi attano bhārabhūtena alajjinā saddhiṃ paribhogaṃ karoti sopi nivāretabbo. Sace na oramati ayaṃpi alajjīyeva hoti. Evaṃ ekopi alajjī alajjisataṃpi karoti. Alajjino pana alajjināva saddhiṃ paribhoge āpatti nāma natthi. Lajjino lajjinā saddhiṃ paribhogo dvinnaṃ khattiyakumārānaṃ suvaṇṇapāṭiyaṃ bhojanasadiso. Dhammiyādhammiyaparibhogo paccayavaseneva veditabbo. Tattha sace puggalopi alajjī piṇḍapātopi adhammiyo ubho jegucchā. Puggalo alajjī piṇḍapāto dhammiyo puggalaṃ jigucchitvā piṇḍapāto na gahetabbo. Mahāpaccariyaṃ pana dussīlo saṅghato uddesabhattādīni labhitvā saṅghasseva deti etāni yathādānameva gatattā vaṭṭantīti vuttaṃ. Puggalo lajjī piṇḍapāto adhammiyo piṇḍapāto jiguccho na gahetabbo. Puggalo lajjī Piṇḍapātopi dhammiyo vaṭṭati.
Apare dve paggahā dve ca paribhogā lajjipaggaho alajjipaggaho dhammaparibhogo āmisaparibhogoti. Tattha alajjino lajjiṃ paggahetuṃ vaṭṭati. Na so āpattiyā kāretabbo. Sace pana lajjī alajjiṃ paggaṇhāti anumodanāya ajjhesati dhammakathāya ajjhesati kulesu upatthambheti itaropi amhākaṃ ācariyo īdiso ca īdiso cāti tassa parisati vaṇṇaṃ bhāsati ayaṃ sāsanaṃ osakkāpeti antaradhāpetīti veditabbo. Dhammaparibhogaāmisaparibhogesu pana yattha āmisaparibhogo vaṭṭati tattha dhammaparibhogopi vaṭṭati. Yo pana koṭiyaṃ ṭhito gaṇṭho tassa puggalassa accayena nassissati taṃ dhammānuggahena uggaṇhituṃ vaṭṭatīti vuttaṃ. Tatrīdaṃ vatthu mahābhaye kira ekasseva bhikkhuno mahāniddeso paguṇo ahosi. Atha catunnikāyikatissattherassa upajjhāyo mahātipiṭakatthero nāma mahārakkhitattheraṃ āha āvuso mahārakkhita etassa santike mahāniddesaṃ gaṇhāhīti. Pāpo kirāyaṃ bhante na gaṇhāmīti. Gaṇhāvuso ahante santike nisīdissāmīti. Sādhu bhante tumhesu nisinnesu uggaṇhissāmīti paṭṭhapetvā rattindivaṃ nirantaraṃ pariyāpuṇanto osānadivase heṭṭhāmañce itthiṃ disvā bhante sutaṃyeva me pubbe sacāhaṃ evaṃ jāneyyaṃ na īdisassa santike dhammaṃ pariyāpuṇeyyanti āha. Tassa pana santike bahū mahātherā uggaṇhitvā mahāniddesaṃ patiṭṭhapesuṃ.