{624} Sattāhātikkante atikkantasaññī nissaggiyaṃ pācittiyanti sacepi sāsapamattaṃ hoti sakiṃ vā aṅguliyā gahetvā jivhāya sāyanamattaṃ nissajjitabbameva pācittiyañca desetabbaṃ. Na kāyikena paribhogena paribhuñjitabbanti kāyo vā kāye aru vā na makkhetabbaṃ. Tehi makkhitāni kāsāvakattarayaṭṭhiupāhanapāda- kaṭṭhalikamañcapiṭhādīnipi aparibhogāni. Dvāravātapānakavāṭesupi hatthena gahaṇaṭṭhānaṃ na makkhetabbanti mahāpaccariyaṃ vuttaṃ. Kasāve pana pakkhipitvā dvāravātapānakavāṭāni makkhitabbānīti mahāaṭṭhakathāyaṃ vuttaṃ. Anāpatti antosattāhaṃ adhiṭṭhetīti sattāhabbhantare sappi ca telañca vasañca muddhani telaṃ vā abbhañjanaṃ vā madhuṃ arumakkhanaṃ phāṇitaṃ gharadhūpanaṃ adhiṭṭheti anāpatti. Sace adhiṭṭhitatelaṃ anadhiṭṭhitatelabhājane ākīritukāmo hoti bhājane ce sukhumachiddaṃ paviṭṭhapaviṭṭhaṃ telaṃ purāṇatelena ajjhottharīyati puna adhiṭṭhātabbaṃ. Atha mahāmukhaṃ hoti sahasāva bahutelaṃ pavisitvā purāṇatelaṃ ajjhottharati puna adhiṭṭhānakiccaṃ natthi. Adhiṭṭhitagatikameva hi taṃ hoti. Etena nayena adhiṭṭhitatelabhājane anadhiṭṭhitatelaākīraṇampi veditabbaṃ. {625} Vissajjetīti ettha sace dvinnaṃ santakaṃ ekena paṭiggahitaṃ avibhattaṃ hoti sattāhātikkame dvinnaṃpi anāpatti paribhuñjituṃ pana na vaṭṭati. Sace yena paṭiggahitaṃ so itaraṃ bhaṇati āvuso imaṃ telaṃ sattāhaṃ pattaṃ paribhuñja naṃ tvanti so ca paribhogaṃ na karoti kassa āpatti. Na kassacipi āpatti. Kasmā. Yena paṭiggahitaṃ tena vissajjitattā itarassa apaṭiggahitattā. Vinassatīti aparibhogaṃ hoti. Cattenāti ādīsu yena cittena bhesajjaṃ cattaṃ ca vantaṃ ca muttaṃ ca hoti taṃ cittaṃ cattaṃ vantaṃ muttanti vuccati. Tena cittena puggalo anapekkho vuccati. Evaṃ anapekkho sāmaṇerassa datvāti attho. Idaṃ kasmā vuttaṃ. Evaṃ antosattāhe datvā pacchā paṭilabhitvā paribhuñjantassa anāpattidassanatthanti mahāsumatthero āha. Mahāpadumatthero panāha nayidaṃ yācitabbaṃ antosattāhe dinnassa hi puna paribhoge āpattiyeva natthi sattāhātikkantassa pana paribhoge anāpattidassanatthamidaṃ vuttaṃ tasmā evaṃ dinnabhesajjaṃ sace sāmaṇero abhisaṅkharitvā vā anabhisaṅkharitvā vā tassa bhikkhuno natthukammatthaṃ dadeyya gahetvā natthukammaṃ kātabbaṃ. Sace bālo hoti dātuṃ na jānāti aññena bhikkhunā vattabbo atthi te sāmaṇera telanti. Āma bhante atthīti. Āhara therassa bhesajjaṃ karissāmāti. Evaṃpi vaṭṭati. Sesaṃ uttānatthameva.