Tattha ticīvaraṃ adhiṭṭhahantena rajitvā kappabinduṃ datvā pamāṇayuttameva adhiṭṭhātabbaṃ. Tassa pamāṇaṃ ukkaṭṭhaparicchedena sugatacīvarato ūnakaṃ vaṭṭati. Lāmakaparicchedena ca saṅghāṭiyā ca uttarāsaṅgassa ca dīghato muṭṭhipañcakaṃ tiriyato muṭṭhitikaṃ pamāṇaṃ vaṭṭati. Antaravāsako dīghato muṭṭhipañcako tiriyaṃ dvihatthopi vaṭṭati. Nivāsanena pārupanenapi hi sakkā nābhiṃ paṭicchādetunti. Vuttappamāṇato pana atirekaṃ ca ūnakaṃ ca parikkhāracolanti adhiṭṭhātabbaṃ. Tattha yasmā dve cīvarassa adhiṭṭhānāni kāyena vā adhiṭṭheti vācāya vā adhiṭṭhetīti vuttaṃ tasmā purāṇasaṅghāṭiṃ imaṃ saṅghāṭiṃ paccuddharāmīti paccuddharitvā navasaṅghāṭiṃ hatthena gahetvā vā sarīrāvayave ṭhapetvā vā imaṃ saṅghāṭiṃ adhiṭṭhāmīti cittena ābhogaṃ katvā kāyavikāraṃ karontena kāyena adhiṭṭhātabbā. Idaṃ kāyena adhiṭṭhānaṃ. Taṃ yenakenaci sarīrāvayavena aphusantassa na vaṭṭati. Vācāya adhiṭṭhāne pana vacībhedaṃ katvā vācāya adhiṭṭhātabbā. Tatra duvidhaṃ adhiṭṭhānaṃ. Sace hatthapāse hoti imaṃ saṅghāṭiṃ adhiṭṭhāmīti vācā bhinditabbā. Atha antogabbhe vā uparipāsāde vā sāmantavihāre vā hoti
Ṭhapitaṭṭhānaṃ sallakkhetvā etaṃ saṅghāṭiṃ adhiṭṭhāmīti vācā bhinditabbā. Esa nayo uttarāsaṅge antaravāsake ca. Nāmamattameva hi viseso. Tasmā sabbāni saṅghāṭiṃ uttarāsaṅgaṃ antaravāsakanti evaṃ attano nāmeneva adhiṭṭhātabbāni. Sace adhiṭṭhahitvā ṭhapitavatthehi saṅghāṭiādīni karoti niṭṭhite rajane ca kappeti ca imaṃ paccuddharāmīti paccuddharitvā puna adhiṭṭhātabbāni. Adhiṭṭhitena pana saddhiṃ mahantatarameva dutiyapaṭaṃ vā khaṇḍaṃ vā saṃsibbantena puna adhiṭṭhātabbaṃ. Same vā khuddake vā adhiṭṭhānakiccaṃ natthi. Ticīvaraṃ pana parikkhāracolaṃ adhiṭṭhātuṃ vaṭṭati na vaṭṭatīti. Mahāpadumatthero kirāha ticīvaraṃ ticīvarameva adhiṭṭhātabbaṃ sace parikkhāracolādhiṭṭhānaṃ labheyya uddositasikkhāpade parihāro niratthako bhaveyyāti. Evaṃ vutte kira avasesā bhikkhū āhaṃsu parikkhāracolaṃpi bhagavatā adhiṭṭhātabbanti vuttaṃ tasmā vaṭṭatīti. Mahāpaccariyaṃpi vuttaṃ parikkhāracolaṃ nāma pāṭekkaṃ nidhānamukhametaṃ ticīvaraṃ parikkhāracolanti adhiṭṭhahitvā paribhuñjituṃ vaṭṭatīti. Uddositasikkhāpade pana ticīvaraṃ adhiṭṭhahitvā pariharantassa parihāro vuttoti. Ubhatovibhaṅgabhāṇako puṇṇavālikavāsī mahātissattheropi kira āha pubbe mayaṃ mahātherānaṃ assumhā araññavāsino bhikkhū rukkhasusirādīsu cīvaraṃ ṭhapetvā padhānaṃ padahanatthāya gacchanti sāmantavihāre dhammassavanatthāya gatānaṃ ca nesaṃ suriye uṭṭhite sāmaṇerā vā daharabhikkhū vā pattacīvaraṃ gahetvā gacchanti tasmā Sukhaparibhogatthaṃ ticīvaraṃ parikkhāracolaṃ adhiṭṭhātuṃ vaṭṭatīti. Mahāpaccariyaṃpi vuttaṃ pubbe āraññikā bhikkhū abaddhasīmāyaṃ dupparihāranti ticīvaraṃ parikkhāracolameva adhiṭṭhahitvā paribhuñjiṃsūti. Vassikasāṭikā anatirittappamāṇā nāmaṃ gahetvā vuttanayeneva cattāro vassike māse adhiṭṭhātabbā tato paraṃ paccuddharitvā vikappetabbā. Vaṇṇabhedamattarattāpi cesā vaṭṭati. Dve pana na vaṭṭanti. Nisīdanaṃ vuttanayena adhiṭṭhātabbameva tañca kho pamāṇayuttaṃ ekameva. Dve na vaṭṭanti. Paccattharaṇaṃpi adhiṭṭhātabbameva. Taṃ pana mahantaṃpi vaṭṭati ekaṃpi vaṭṭati bahūnipi vaṭṭanti. Nīlaṃpi pītakaṃpi sadasaṃpi pupphadasaṃpīti sabbappakāraṃ vaṭṭati. Sakiṃ adhiṭṭhitaṃ adhiṭṭhitameva hoti. Kaṇḍupaṭicchādi yāva ābādho atthi tāva pamāṇikā adhiṭṭhātabbā. Ābādhe vūpasante paccuddharitvā vikappetabbā. Ekāva vaṭṭati. Mukhapuñchanacolaṃ adhiṭṭhātabbameva. Yāva ekaṃ dhovīyati tāva aññaṃ paribhogatthāya icchitabbanti dvepi vaṭṭanti. Apare pana therā nidhānamukhametaṃ bahūnipi vaṭṭantīti vadanti. Parikkhāracole gaṇanā nāma natthi yattakaṃ icchati tattakaṃ adhiṭṭhātabbameva. Thavikāpi parissāvanaṃpi vikappanūpagapacchimacīvarappamāṇaṃ parikkhāracolanti adhiṭṭhātabbameva. Bahūnipi ekato katvā imāni cīvarāni parikkhāracolāni adhiṭṭhāmīti adhiṭṭhātuṃpi vaṭṭatiyeva. Bhesajjanavakammamātāpituādīnaṃ atthāya ṭhapentenapi adhiṭṭhātabbameva. Mahāpaccariyaṃ pana Āpattīti vuttaṃ. Mañcabhisī pīṭhakabhisī bimbohanaṃ pāvāro kojavo cāti etesu pana senāsanaparikkhāratthāya dinnapaccattharaṇesu ca adhiṭṭhānakiccaṃ natthiyeva.