Pubbepi vassikasāṭikacīvaraṃ denti te pana sacepi attano aññātakaappavāritā honti vattabhedo natthi tesu satuppādakaraṇassa anuññātattā. Viññattiṃ katvā nipphādentassa aññātakaviññattisikkhāpadena nissaggiyaṃ pācittiyaṃ. Kasmā. Ye manussā pubbe vassikasāṭikacīvaraṃ denti te upasaṅkamitvā evamassa vacanīyāti vuttattā. Idaṃ pana pakatiyā vassikasāṭikadāyakesupi hotiyeva. Vuttanayeneva satuppādaṃ katvā ñātakapavāritaṭṭhānato nipphādentassa iminā sikkhāpadena anāpatti viññattiṃ katvā nipphādentassa aññātakaviññattisikkhāpadena anāpatti. Na vattabbā detha meti idaṃ hi pariyesanakāle aññātakaappavāriteyeva sandhāya vuttaṃ. Evaṃ kucchisamayacatukkaṃ veditabbaṃ. Naggo kāyaṃ ovassāpeti āpatti dukkaṭassāti ettha udakaphusitagaṇanāya akatvā nahānapariyosānavasena payoge payoge dukkaṭena kāretabbo. So ca kho vivaṭaṅgaṇe ākāsato patitaudakeneva nahāyanto. Nahānakoṭṭhakavāpīādīsu ghaṭehi āsittaudakena vā nahāyantassa anāpatti. Vassaṃ ukkaḍḍhīyatīti ettha sace katapariyositāya vassikasāṭikāya gimhānaṃ pacchimamāsaṃ khepetvā puna vassānassa paṭhamamāsaṃ ukkaḍḍhitvā gimhānaṃ pacchimamāsameva karonti vassikasāṭikā dhovitvā nikkhipitabbā. Anadhiṭṭhitā avikappitā dve māse parihāraṃ labhati. Vassūpanāyikadivase adhiṭṭhātabbā. Sace satisammosena vā appahonakabhāvena Vā akatā hoti te ca dve māse vassānassa cātummāsanti chammāse parihāraṃ labhati. Sace pana kattikamāse kaṭhinaṃ attharīyati apare cattāro māse labhati. Evaṃ dasa māsā honti. Tato paraṃpi satiyā paccāsāya mūlacīvaraṃ katvā ṭhapentassa ekamāsanti evaṃ ekādasamāse parihāraṃ labhati. Sace pana ekāhadvīhādivasena yāva dasāhā anāgatāya vassūpanāyikāya antovasse vā laddhā ceva niṭṭhitā ca kadā adhiṭṭhātabbāti. Etaṃ aṭṭhakathāsu na vicāritaṃ. Laddhadivasato paṭṭhāya antodasāhe niṭṭhitā ca pana tasmiṃyeva antodasāhe adhiṭṭhātabbā. Dasāhātikkame niṭṭhitā tadahe adhiṭṭhātabbā dasāhe appahonte cīvarakālaṃ nātikkametabbāti ayaṃ no attano mati. Kasmā. Anujānāmi bhikkhave ticīvaraṃ adhiṭṭhātuṃ na vikappetuṃ vassikasāṭikaṃ vassānaṃ cātummāsaṃ adhiṭṭhātuṃ tato paraṃ vikappetunti hi vuttaṃ. Tasmā vassūpanāyikato pubbe dasāhātikkamepi anāpatti. Dasāhaparamaṃ atirekacīvaraṃ dhāretabbanti hi vuttaṃ. Tasmā ekāhadvīhādivasena yāva dasāhā anāgatāya vassūpanāyikāya antovasse vā laddhā ceva niṭṭhitā ca vuttanayeneva antodasāhe vā tadahu vā adhiṭṭhātabbā dasāhe appahonte cīvarakālaṃ nātikkametabbā. Tattha siyā vassānaṃ cātummāsaṃ adhiṭṭhātunti vacanato cātummāsabbhantare yadā vā tadā vā adhiṭṭhātuṃ vaṭṭatīti. Yadi evaṃ kaṇḍupaṭicchādiṃ yāva ābādhā adhiṭṭhātunti vuttaṃ sāpi ca dasāhaṃ