TIPITAKA Volume 2 : PALI ROMAN Vinaya Pitaka Vol 2 : Vinaya. Mahāvi (2) Sattamasikkhāpadaṃ

[555] Tena samayena buddho bhagavā sakkesu viharati kapilavatthusmiṃ nigrodhārāme . tena kho pana samayena mahānāmassa sakkassa bhesajjaṃ ussannaṃ hoti . athakho mahānāmo sakko yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho mahānāmo sakko bhagavantaṃ etadavoca icchāmahaṃ bhante saṅghaṃ cātumāsaṃ bhesajjena pavāretunti . sādhu sādhu mahānāma tenahi tvaṃ mahānāma saṅghaṃ cātumāsaṃ bhesajjena pavārehīti. Bhikkhū kukkuccāyantā nādhivāsenti . bhagavato etamatthaṃ ārocesuṃ . anujānāmi bhikkhave cātumāsapaccayapavāraṇaṃ sāditunti. {555.1} Tena kho pana samayena bhikkhū mahānāmaṃ sakkaṃ parittaṃyeva bhesajjaṃ viññāpenti . tatheva mahānāmassa sakkassa bhesajjaṃ ussannaṃ hoti . dutiyampi kho mahānāmo sakko yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho mahānāmo sakko bhagavantaṃ etadavoca icchāmahaṃ bhante saṅghaṃ aparaṃpi cātumāsaṃ bhesajjena pavāretunti . sādhu sādhu mahānāma tenahi tvaṃ mahānāma saṅghaṃ aparaṃpi cātumāsaṃ bhesajjena pavārehīti. Bhikkhū kukkuccāyantā nādhivāsenti . bhagavato etamatthaṃ ārocesuṃ. Anujānāmi bhikkhave puna pavāraṇaṃpi sāditunti. {555.2} Tena kho pana samayena bhikkhū mahānāmaṃ sakkaṃ parittaṃyeva bhesajjaṃ viññāpenti . tatheva mahānāmassa sakkassa bhesajjaṃ ussannaṃ hoti . tatiyampi kho mahānāmo sakko yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho mahānāmo sakko bhagavantaṃ etadavoca icchāmahaṃ bhante saṅghaṃ yāvajīvaṃ bhesajjena pavāretunti . sādhu sādhu mahānāma tenahi tvaṃ mahānāma saṅghaṃ yāvajīvaṃ bhesajjena pavārehīti . bhikkhū kukkuccāyantā nādhivāsenti . bhagavato etamatthaṃ ārocesuṃ . Anujānāmi bhikkhave niccapavāraṇaṃpi sāditunti.