๑๔. เอตทคฺควคฺค

๑. ปฐมวคฺค

เอตทคฺคปทวณฺณนา

[๑๘๘] เอตทคฺเคสุ ปฐมวคฺคสฺส ปฐเม เอตทคฺคนฺติ เอตํ อคฺคํ. เอตฺถ จ อยํ อคฺคสทฺโท อาทิโกฏิโกฏฺฐาสเสฏฺเฐสุ ทิสฺสติ. "อชฺชตคฺเค สมฺม โทวาริก อาวรามิ ทฺวารํ นิคณฺฐานํ นิคณฺฐีนนฺ"ติอาทีสุ ๑- หิ อาทิมฺหิ ทิสฺสติ. "เตเนว องฺคุลคฺเคน ตํ องฺคุลคฺคํ ปรามเสยฺย, ๒- อุจฺฉุคฺคํ เวฬุคฺคนฺ"ติอาทีสุ โกฏิยํ. "อมฺพิลคฺคํ วา มธุรคฺคํ วา ติตฺตคฺคํ วา, ๓- อนุชานามิ ภิกฺขเว วิหารคฺเคน วา ปริเวณคฺเคน วา ภาเชตุนฺ"ติอาทีสุ ๔- โกฏฺฐาเส. "ยาวตา ภิกฺขเว สตฺตา อปทา วา ฯเปฯ ตถาคโต เตสํ อคฺคมกฺขายตี"ติอาทีสุ ๕- เสฏฺเฐ. สฺวายมิธ โกฏิยํปิ วฏฺฏติ เสฏฺเฐปิ. เต หิ เถรา อตฺตโน อตฺตโน เสฏฺฐฏฺฐาเน ๖- โกฏิภูตาติ อคฺคา เสฏฺฐภูตาติปิ. ตสฺมา เอตทคฺคนฺติ เอสา โกฏิ เอโส เสฏฺโฐติ อยเมตฺถ อตฺโถ. เอเสว นโย สพฺพสุตฺเตสุ.