๗. สตฺตมวคฺค

สุชาตาวตฺถุ

[๒๕๘] อุปาสิกาปาลิยา ปฐเม ปฐมํ สรณํ คจฺฉนฺตีนนฺติ สพฺพปฐมํ สรเณสุ ปติฏฺฐิตานํ อุปาสิกานํ สุชาตา นาม เสนิยธีตา ๑- อคฺคาติ ทสฺเสติ. สาปิ ปทุมุตฺตรพุทฺธกาเล หํสวติยํ กุลเคเห นิพฺพตฺติ. สา อปรภาเค สตฺถุ ธมฺมกถํ สุณนฺตี สตฺถารํ เอกํ อุปาสิกํ ปฐมํ สรณํ คจฺฉนฺตีนํ อคฺคฏฺฐาเน ฐเปนฺตํ ทิสฺวา อธิการกมฺมํ กตฺวา ตํ ฐานนฺตรํ ปฏฺเฐสิ. สา กปฺปสตสหสฺสํ เทวมนุสฺเสสุ สํสริตฺวา อมฺหากํ สตฺถุ นิพฺพตฺติโต ปุเรตรเมว อุรุเวลายํ เสนานิคเม เสนิยกุฏุมฺพิกสฺส เคเห นิพฺพตฺติตฺวา วยปฺปตฺตา เอกสฺมึ นิโคฺรธรุกฺเข ปฏฺฐนํ อกาสิ "สเจ สมชาติกํ กุลฆรํ คนฺตฺวา ปฐมคพฺเภ ปุตฺตํ ลภิสฺสามิ, อนุสํวจฺฉรํ พลิกมฺมํ กริสฺสามี"ติ. ตสฺสา สา ปฏฺฐนา สมิชฺฌิ.

สา มหาสตฺตสฺส ทุกฺกรการิกํ กโรนฺตสฺส ฉฏฺเฐ วสฺเส ปริปุณฺเณ วิสาขปุณฺณมีทิวเส ๒- "ปาโตว พลิกมฺมํ กริสฺสามี"ติ รตฺติยา ปจฺจูสสมยํ ปจฺจุฏฺฐาย เธนุโย ทุหาเปสิ. วจฺฉกา เธนูนํ ถนมูลํ น อคมํสุ, ถนมูเล นวภาชนมฺหิ ๓- อุปนีตมตฺเต อตฺตโนว ธมฺมตาย ขีรธารา ปสวึสุ. ๔- ตํ อจฺฉริยํ ทิสฺวา สุชาตา สหตฺเถเนว ขีรํ คณฺหิตฺวา นวภาชเน ปกฺขิปิตฺวา สหตฺเถเนว อคฺคึ กตฺวา ปจิตุมารภิ. ๕- ตสฺมึ ปายาเส ปจฺจมาเน มหนฺตมหนฺตา ปุพฺพุฬกา ๖- อุฏฺฐหิตฺวา ทกฺขิณาวฏฺฏา หุตฺวา สญฺจรนฺติ, เอกผุสฺสิตํปิ พหิ น คจฺฉติ. มหาพฺรหฺมา ฉตฺตํ ธาเรติ, จตฺตาโร โลกปาลา ขคฺคหตฺถา อารกฺขํ คณฺหึสุ, สกฺโก อลาตานิ สมาเนนฺโต อคฺคึ ชาเลสิ. เทวตา จตูสุ ทีเปสุ โอชํ สํหริตฺวา ตตฺถ ปกฺขิปึสุ. สุชาตา เอกทิวเสเยว อิมานิ อจฺฉริยานิ ทิสฺวา ปุณฺณทาสึ อามนฺเตสิ "อมฺม ปุณฺเณ อชฺช อมฺหากํ เทวตา