เอวํ นิฏฺฐิเตสุ ปาสาเทสุ ราชา จินฺเตสิ "ปุตฺโต เม วยปฺปตฺโต, ฉตฺตมสฺส อุสฺสาเปตฺวา รชฺชสิรึ ปสฺสิสฺสามี"ติ. โส สากิยานํ ปณฺณานิ ปหิณิ "ปุตฺโต เม วยปฺปตฺโต, รชฺเช นํ ปติฏฺฐาเปสฺสามิ, สพฺเพ อตฺตโน อตฺตโน เคเหสุ ทาริกา อิมํ เคหํ เปเสนฺตู"ติ. เต สาสนํ สุตฺวา "กุมาโร เกวลํ ทสฺสนกฺขโม รูปสมฺปนฺโน, น กิญฺจิ สิปฺปํ ชานาติ, ทารภรณํ กาตุํ น สกฺขิสฺสติ, น มยํ ธีตโร ทสฺสามา"ติ อาหํสุ. ราชา ตํ ปวุตฺตึ สุตฺวา ปุตฺตสฺส สนฺติกํ คนฺตฺวา อาโรเจสิ. โพธิสตฺโต "กึ สิปฺปํ ทสฺเสตุํ วฏฺฏติ ตาตา"ติ อาห. สหสฺสถามธนุํ อาโรเปตุํ วฏฺฏติ ตาตาติ. เตนหิ อาหราเปถาติ. ราชา อาหราเปตฺวา อทาสิ. ธนุํ ปุริสสหสฺสํ อาโรเปติ, ปุริสสหสฺสํ โอโรเปติ. มหาปุริโส ธนุํ อาหราเปตฺวา ปลฺลงฺเก นิสินฺโนว ชิยํ ปาทงฺคุฏฺฐเก เวเฐตฺวา กฑฺฒนฺโต ปาทงฺคุฏฺฐเกเนว ธนุํ อาโรเปตฺวา วาเมน หตฺเถน ทณฺฑํ ๔- คเหตฺวา ทกฺขิเณน หตฺเถน กฑฺฒิตฺวา ชิยํ โปเฐสิ. สกลนครํ อุปฺปตนาการปฺปตฺตํ อโหสิ. "กึ สทฺโท เอโส"ติ จ วุตฺเต "เทโว คชฺชตี"ติ อาหํสุ. อถญฺเญ "ตุเมฺห น ชานาถ, น เทโว คชฺชติ, องฺคีรสสฺส กุมารสฺส สหสฺสถามธนุํ อาโรเปตฺวา ชิยํ โปเฐนฺตสฺส ชิยปฺปหารสทฺโท เอโส"ติ อาหํสุ. สากิยา ตาวตฺตเกเนว อารทฺธจิตฺตา อเหสุํ.

@ทฺวารวาตปานา รตฺตึ วิวฏา ทิวา ปิหิตา, เอกจฺเจ ทิวา วิวฏา รตฺตึ ปิหิตา

@๔ ฉ.ม.,อิ. ทณฺเฑ