เอวํ วุตฺเต เถโร จินฺเตสิ "สตฺถา เอวมาห `อากงฺขมาโน อานนฺท ตถาคโต ติสหสฺสึ มหาสหสฺสึ โลกธาตุํ สเรน วิญฺญาเปยฺย, ยาวตา วา ปน อากงฺเขยฺยา'ติ. วิสโม โข ปนายํ โลโก, อนนฺตานิ จกฺกวาฬานิ, เอกสฺมึปิ ฐาเน สุริโย อุคฺคโต โหติ, เอกสฺมึ ฐาเน มชฺเฌ ฐิโต, เอกสฺมึ ฐาเน อตฺถงฺคโต. เอกสฺมึ ฐาเน ปฐมยาโม โหติ, เอกสฺมึ มชฺฌิมยาโม, เอกสฺมึ ปจฺฉิมยาโม. สตฺตาปิ กมฺมปฺปสุตา ขิฑฺฑาปฺปสุตา อาหารปฺปสุตาติ เอวํ เตหิ เตหิ การเณหิ วิกฺขิตฺวา จ ปมตฺตา จ โหนฺติ. กถํ นุ โข เต สตฺถา ปเรน วิญฺญาเปยฺยา"ติ. โส เอวํ จินฺเตตฺวา วิมติจฺเฉทนตฺถํ ตถาคตํ ปุจฺฉนฺโต ยถากถํ ปนาติอาทิมาห.

อถสฺส สตฺถา พฺยากโรนฺโต อิธานนฺท ตถาคโตติอาทิมาห. ตตฺถ โอภาเสน ผเรยฺยาติ สรีโรภาเสน ผเรยฺย. ผรมาโน ปเนส กึ กเรยฺยาติ? ยสฺมึ ฐาเน