สุตฺตนฺตปริยาเยน เทวสิกํ ผลสมาปตฺติสมาปชฺชนํ มหากรุณาสมาปตฺติสมาปชฺชนํ พุทฺธจกฺขุนา โลกโวโลกนํ อตฺถุปฺปตฺติวเสน สุตฺตนฺตเทสนา ชาตกกถาติ อิทํ อาจิณฺณํ, น เทวสิกํ ผลสมาปตฺติสมาปชฺชนํ ฯเปฯ น ชาตกกถาติ อิทํ อนาจิณฺณํ. วินยปริยาเยน นิมนฺติตสฺส วสฺสาวาสํ วสิตฺวา อปโลเกตฺวา จาริกปกฺกมนํ ปวาเรตฺวา จาริกปกฺกมนํ, อาคนฺตุเกหิ สทฺธึ ปฐมํ ปฏิสณฺฐารกรณนฺติ อิทํ อาจิณฺณํ, ตสฺเสว อาจิณฺณสฺส อกรณํ อิทํ อนาจิณฺณํ นาม.

สุตฺตนฺตปริยาเยน จตฺตาโร สติปฏฺฐานา ฯเปฯ อฏฺฐงฺคิโก มคฺโคติ อิทํ ปญฺญตฺตํ นาม, ตโย สติปฏฺฐานา ฯเปฯ นวงฺคิโก มคฺโคติ อิทํ อปญฺญตฺตํ นาม. วินยปริยาเยน จตฺตาโร ปาราชิกา ฯเปฯ ตึส นิสฺสคฺคิยา ปาจิตฺติยาติ อิทํ ปญฺญตฺตํ นาม, ตโย ปาราชิกา ฯเปฯ เอกตฺตึส นิสฺสคฺคิยา ปาจิตฺติยาติ อิทํ อปญฺญตฺตํ นาม.

ยํ ปเนตํ สพฺพสุตฺตานํ ปริโยสาเน เต จิมํ ธมฺมํ อนฺตรธาเปนฺตีติ วุตฺตํ, ตตฺถ ปญฺจ อนฺตรธานานิ นาม อธิคมอนฺตรธานํ ปฏิปตฺติอนฺตรธานํ ปริยตฺติอนฺตรธานํ ลิงฺคอนฺตรธานํ ธาตุอนฺตรธานนฺติ. ตตฺถ อธิคโมติ จตฺตาโร มคฺคา จตฺตาริ ผลานิ จตสฺโส ปฏิสมฺภิทา ติสฺโส วิชฺชา ฉ อภิญฺญาติ. โส ปริหายมาโน ปฏิสมฺภิทาโต ปฏฺฐาย ปริหายติ. พุทฺธานํ หิ ปรินิพฺพานโต วสฺสสหสฺสเมว ปฏิสมฺภิทา นิพฺพตฺเตตุํ น ๑- สกฺโกนฺติ, ตโต ปรํ ฉ อภิญฺญา, ตโต ตาปิ นิพฺพตฺเตตุํ