สตฺถา เถรสฺส กิลมนภาวํ ญตฺวา ๓- "สาริปุตฺโต กิลมติ, นยมุขมสฺส ทสฺสิสฺสามี"ติ "อาคเมหิ ตฺวํ สาริปุตฺตา"ติ วตฺวา "นายํ ตุยฺหํ วิสโย ปโญฺห, พุทฺธานํ เอส วิสโย สพฺพญฺญูนํ ยสสฺสีนนฺ"ติ พุทฺธวิสยภาวํ อาวิกตฺวา ๔- "ภูตมิทํ สาริปุตฺต ปสฺสสี"ติ ๕- อาห. เถโร "จตุมหาภูติกกายปริคฺคหํ เม ภควา อาจิกฺขตี"ติ ญตฺวา "อญฺญาตํ ภควา, อญฺญาตํ สุคตา"ติ อาห. เอตสฺมึ ฐาเน อยํ กถา อุทปาทิ:- มหาปญฺโญ วต โภ สาริปุตฺตตฺเถโร นาม สพฺเพหิ อญฺญาตํ ๖- ปญฺหํ กเถสิ, พุทฺเธหิ จ ทินฺนนเย ฐตฺวา พุทฺธวิสเย ปญฺหํ กเถสิ, อิติ เถรสฺส ปญฺญานุภาโว ยตฺตกํ ฐานํ พุทฺธานํ กิตฺติสทฺเทน โอตฺถตํ, สพฺพํ อชฺโฌตฺถริตฺวา คโตติ. เอวํ ตาว เถโร อตฺถุปฺปตฺติโต มหาปญฺญตาย เอตทคฺคฏฺฐานํ ลภิ.

กถํ อาคมนโต? อิมิสฺสาเยว หิ อตฺถุปฺปตฺติยา สตฺถา อาห:- สาริปุตฺโต น อิทาเนว ปญฺญวาติ, อตีเต ปญฺจ ชาติสตานิ อิสิปพฺพชฺชํ ปพฺพชิตฺวาปิ มหา- ปญฺโญว อโหสิ:-

@๔ ฉ.ม. อาจิกฺขิตฺวา ๕ ฉ.ม. สมนุปสฺสสีติ ๖ ฉ.ม.,อิ. ยตฺร หิ สพฺเพหิ อนญฺญาตํ