ปรินิพฺพุตํ วนฺทถ สาริปุตฺตนฺ"ติ.

เอวํ ปพฺพชฺชํ อุปพฺรูหยมาโน เอกสฺมึ สมเย พาราณสิยํ พฺราหฺมณกุเล นิพฺพตฺโต. ตโย เวเท อุคฺคณฺหิตฺวา ตตฺถ สารํ อปสฺสนฺโต "ปพฺพชิตฺวา เอกํ โมกฺขธมฺมํ คเวสิตุํ วฏฺฏตี"ติ จิตฺตํ อุปฺปาเทสิ. ตสฺมึ กาเล โพธิสตฺโตปิ กาสิกรฏฺเฐ อุทิจฺจพฺราหฺมณมหาสาลกุเล นิพฺพตฺโต วุฑฺฒิมนฺวาย อุคฺคหิตสิปฺโป กาเมสุ อาทีนวํ เนกฺขมฺเม จ อานิสํสํ ทิสฺวา ฆราวาสํ ปหาย หิมวนฺตํ ปวิสิตฺวา กสิณปริกมฺมํ กตฺวา ปญฺจ อภิญฺญา อฏฺฐ สมาปตฺติโย นิพฺพตฺเตตฺวา วนมูลผลาหาโร หิมวนฺตปสฺเส ๑- วสติ. โสปิ มาณโว นิกฺขมิตฺวา ตสฺเสว สนฺติเก ปพฺพชิ. ปริวาโร มหา อโหสิ ปญฺจสตมตฺตา อิสโย.

อถสฺส โส เชฏฺฐนฺเตวาสิโก เอกเทสปริสํ คเหตฺวา โลณมฺพิลเสวนตฺถํ มนุสฺสปถํ อคมาสิ. ตสฺมึ สมเย โพธิสตฺโต ตสฺมึเยว หิมวนฺตปเทเส กาลมกาสิ. กาลกิริยสมเย ปน อนฺเตวาสิกา สนฺนิปติตฺวา ปุจฺฉึสุ "อตฺถิ ตุเมฺหหิ โกจิ วิเสโส อธิคโต"ติ. โพธิสตฺโต "นตฺถิ กิญฺจี"ติ วตฺวา อปริหีนชฺฌาโน อาภสฺสรพฺรหฺมโลเก นิพฺพตฺโต. โส กิญฺจาปิ อากิญฺจญฺญายตนสฺส ลาภี, โพธิสตฺตานมฺปน อรูปาวจเร ปฏิสนฺธิ นาม น โหติ. กสฺมา? อภพฺพฏฺฐานตฺตา. อิติ โส อรูปสมาปตฺติลาภี สมาโน ๒- รูปาวจเร นิพฺพตฺติ. อนฺเตวาสิกาปิ "อาจริโย `นตฺถิ กิญฺจี'ติ อาห, โมฆา ตสฺส กาลกิริยา"ติ น กิญฺจิ สกฺการสมฺมานํ อกํสุ. อถ โส เชฏฺฐนฺเตวาสิโก อติกฺกนฺเต วสฺสาวาเส อาคนฺตฺวา "กหํ อาจริโย"ติ ปุจฺฉิ. กาลกโตติ. อปิ นุ อาจริเยน ลทฺธคุณํ ปุจฺฉิตฺถาติ. อาม ปุจฺฉิมฺหาติ. กึ วเทตีติ. นตฺถิ กิญฺจีติ.