ตํ วีตราคํ สุสมาหิตินฺทฺริยํ

ปรินิพฺพุตํ วนฺทถ โมคฺคลฺลานนฺติ.

ยถาเปส, ๔- เอวํ มหากสฺสปตฺเถโรปิ สพฺเพหิปิ อิเมหิ การเณหิ เอตทคฺคฏฺฐานํ ลภิ. กถํ? สมฺมาสมฺพุทฺโธ หิ เถรสฺส ติคาวุตมตฺตํ ปจฺจุคฺคมนํ กตฺวา ตีหิ โอวาเทหิ อุปสมฺปาเทตฺวา จีวรํ ปริวตฺเตตฺวา อทาสิ. ตสฺมึ สมเย มหาปฐวี อุทกปริยนฺตํ กตฺวา กมฺปิ, มหาชนสฺส อพฺภนฺตเร เถรสฺส กิตฺติสทฺโท อชฺโฌตฺถริตฺวา คโต. เอวํ อตฺถุปฺปตฺติโต ลภิ. น เจส อิทาเนว ธุตวาโท, ๕- อตีเต ปญฺจ ชาติสตานิ อิสิปพฺพชฺชํ ปพฺพชิโตปิ ธุตวาโท อโหสีติ.