โย ปพฺพชี ชาติสตานิ ปญฺจ

ปหาย กามานิ มโนรมานิ

ตํ วีตราคํ สุสมาหิตินฺทฺริยํ

ปรินิพฺพุตํ วนฺทถ กสฺสปนฺติ. ๖- เอวํ อาคมนโต ลภิ. จิณฺณญฺเจตํ เถรสฺส จตุปริสมชฺฌคโต ธมฺมํ กเถนฺโต ทส กถาวตฺถูนิ อวิชหิตฺวาว กเถตีติ เอวํ จิณฺณวสิโต ลภิ. ฐเปตฺวา สมฺมาสมฺพุทฺธํ อญฺโญ สาวโก เตรสหิ ธุตงฺคคุเณหิ มหากสฺสปสทิโส นตฺถีติ เอวํ คุณาติเรกโต ลภิ. อิมินาว นิยาเมน เตสํ เตสํ เถรานํ ยถาลาภโต คุเณ กิตฺเตตุํ วฏฺฏติ.