สตฺถา ตสฺส วจนํ สุตฺวา "อิมินา กุลปุตฺเตน มหาอธิกาโร กโต, สมิชฺฌิสฺสติ นุ โข เอตสฺส อยํ ปตฺถนา โน"ติ อนาคตํสญาณํ เปเสตฺวา อาวชฺเชนฺโต สมิชฺฌนภาวํ ๑- ปสฺสิ. พุทฺธานํ หิ อตีตํ วา อนาคตํ วา ปจฺจุปฺปนฺนํ วา อารพฺภ อาวชฺเชนฺตานํ อาวรณํ นาม นตฺถิ, อเนกกปฺปโกฏิสตสหสฺสนฺตรมฺปิ ๒- อตีตํ วา อนาคตํ วา จกฺกวาฬสตสหสฺสนฺตรมฺปิ ๓- ปจฺจุปฺปนฺนํ วา อาวชฺชนปฏิพทฺธเมว มนสิการปฏิพทฺธเมว โหติ. เอวํ อปฺปฏิวตฺติเยน ๔- ญาเณน โส ภควา อิทํ อทฺทส "อนาคเต สตสหสฺสกปฺปปริโยสาเน โคตโม นาม พุทฺโธ โลเก อุปฺปชฺชิสฺสติ, ตทา อิมสฺส ปฏฺฐนา สมิชฺฌิสฺสตี"ติ. อถ นํ เอวมาห "อมฺโภ กุลปุตฺต อนาคเต สตสหสฺสกปฺปปริโยสาเน โคตโม นาม พุทฺโธ โลเก อุปฺปชฺชิสฺสติ, ตฺวํ ตสฺส ปฐมเมว ธมฺมเทสนาย ติปริวฏฺฏธมฺมจกฺกปฺปวตฺตนสุตฺตนฺตปริโยสาเน อฏฺฐารสหิ พฺรหฺมโกฏีหิ สทฺธึ สหสฺสนยสมฺปนฺเน โสตาปตฺติผเล ปติฏฺฐหิสฺสสี"ติ.

อิติ สตฺถา ตํ กุลปุตฺตํ พฺยากริตฺวา จตุราสีติ ธมฺมกฺขนฺธสหสฺสานิ เทเสตฺวา อนุปาทิเสสาย นิพฺพานธาตุยา ปรินิพฺพายิ. ตสฺส ปรินิพฺพุตสฺส สรีรํ สุวณฺณกฺขนฺโธ วิย เอกฆนํ อโหสิ, สรีรเจติยมฺปนสฺส อุพฺเพเธน สตฺตโยชนิกํ อกํสุ. อิฏฺฐกา