สรทตาปโสปิ อนฺเตวาสิกตฺเถรานํ สนฺติกํ คนฺตฺวา สหายกสฺส สิริวฑฺฒ- กุฏุมฺพิกสฺส สาสนํ เปเสสิ "ภนฺเต มม สหายกสฺส วเทถ `สหายเกน เต สรทตาปเสน อโนมทสฺสิสฺส พุทฺธสฺส ปาทมูเล อนาคเต อุปฺปชฺชนกสฺส โคตมสฺส พุทฺธสฺส สาสเน อคฺคสาวกฏฺฐานํ ปฏฺฐิตํ, ตฺวญฺจ ทุติยสาวกฏฺฐานํ ปฏฺเฐหี"ติ. เอวญฺจ ปน วตฺวา เถเรหิ ปุเรตรเมว เอกมุหุตฺเตน ๑- คนฺตฺวา สิริวฑฺฒสฺส นิเวสนทฺวาเร อฏฺฐาสิ.

สิริวฑฺโฒ "จิรสฺสํ วต เม อยฺโย อาคโต"ติ อาสเน นิสีทาเปตฺวา อตฺตนา นีจตเร อาสเน ๒- นิสินฺโน "อนฺเตวาสิกปริสา ปน เต ภนฺเต น ปญฺญายตี"ติ ปุจฺฉิ. อาม สมฺม อมฺหากํ อสฺสเม อโนมทสฺสี พุทฺโธ อาคโต, มยํ ตสฺส อตฺตโน พเลน สกฺการํ อกริมฺหา. สตฺถา สพฺเพสํ ธมฺมํ เทเสสิ, เทสนาปริโยสาเน ฐเปตฺวา มํ เสสา อรหตฺตํ ปตฺวา ปพฺพชึสูติ. ตุเมฺห กสฺมา น ปพฺพชิตฺถาติ. อหํ สตฺถุ อคฺคสาวกํ นิสภตฺเถรํ ทิสฺวา อนาคเต อุปฺปชฺชนกสฺส โคตมสฺส นาม พุทฺธสฺส สาสเน อคฺคสาวกฏฺฐานํ ปฏฺเฐสึ, ตฺวมฺปิ ตสฺส สาสเน ทุติยสาวกฏฺฐานํ ปฏฺเฐหีติ. มยฺหํ พุทฺเธหิ สทฺธึ ปริจโย นตฺถิ ภนฺเตติ. พุทฺเธหิ สทฺธึ กถนํ มยฺหํ ภาโร โหตุ, ตฺวํ มหนฺตํ อธิการํ สชฺเชหีติ.

สิริวฑฺโฒ ตสฺส วจนํ สุตฺวา อตฺตโน นิเวสเน ฐาเน ราชทณฺเฑน ๓- อฏฺฐกรีสมตฺตํ ฐานํ สมตลํ กาเรตฺวา วาลุกํ โอกิราเปตฺวา ลาชปญฺจมานิ ปุปฺผานิ วิกิริตฺวา นีลุปฺปลจฺฉทนํ มณฺฑปํ กาเรตฺวา พุทฺธาสนํ ปญฺญาเปตฺวา เสสภิกฺขูนมฺปิ อาสนานิ ปฏิยาเทตฺวา มหนฺตํ สกฺการสมฺมานํ สชฺเชตฺวา พุทฺธานํ นิมนฺตนตฺถาย สรทตาปสสฺส สญฺญํ อทาสิ. ตาปโส ตสฺส วจนํ สุตฺวา พุทฺธปฺปมุขํ ภิกฺขุสํฆํ คเหตฺวา ตสฺส นิเวสนํ อคมาสิ. สิริวฑฺโฒ ปจฺจุคฺคมนํ กตฺวา ตถาคตสฺส หตฺถโต ปตฺตํ คเหตฺวา มณฺฑปํ ปเวเสตฺวา ปญฺญตฺตาสเน ๔- นิสินฺนสฺส พุทฺธปฺปมุขสฺส ภิกฺขุสํฆสฺส