อุปติสฺสมาณวสฺส กีฬนตฺถาย นทึ วา อุยฺยานํ วา ปพฺพตํ วา คมนกาเล ปญฺจ สุวณฺณสิวิกาสตานิ ปริวารานิ โหนฺติ, โกลิตมาณวสฺส ปญฺจ อาชญฺญรถสตานิ. เทฺวปิ ชนา ปญฺจปญฺจมาณวกสตปริวารา โหนฺติ. ราชคเห จ อนุสํวจฺฉรํ คิรคฺคสมชฺชํ นาม โหติ, เตสํ ทฺวินฺนมฺปิ เอกฏฺฐาเนเยว มญฺเจ พนฺธนฺติ. เทฺวปิ ชนา เอกโตว นิสีทิตฺวา สมชฺชํ ปสฺสนฺตา หสิตพฺพฏฺฐาเน หสนฺติ, สํเวคฏฺฐาเน สํเวชนฺติ, ทายํ ทาตุํ ยุตฺตฏฺฐาเน ทายํ เทนฺติ. เตสํ อิมินาว นิยาเมน เอกทิวสํ สมชฺชํ ปสฺสนฺตานํ ปริปากคตตฺตา ญาณสฺส ปุริมทิวเส ๑- วิย หสิตพฺพฏฺฐาเน หาโส วา สํเวคฏฺฐาเน สํเวชนํ วา ทายํ ทาตุํ ยุตฺตฏฺฐาเน ทายํ วา นาโหสิ. เทฺวปิ ปน ชนา เอวํ จินฺตยึสุ "กึ เอตฺถ โอโลเกตพฺพํ อตฺถิ, สพฺเพปิเม อปฺปตฺเต วสฺสสเต อปณฺณตฺติกภาวํ คมิสฺสนฺติ. อเมฺหหิ ปน เอกํ โมกฺขธมฺมํ คเวสิตุํ วฏฺฏตี"ติ อารมมณํ คเหตฺวา นิสีทึสุ.

ตโต โกลิโต อุปติสฺสํ อาห "สมฺม อุปติสฺส น ตฺวํ อญฺเญสุ ทิวเสสุ วิย หฏฺฐปหฏฺโฐ, อนตฺตมนธาตุโก อโหสิ, ๒- กึ เต สลฺลกฺขิตนฺ"ติ. สมฺม โกลิต `เอเตสํ โอโลกเน สาโร นตฺถิ, นิรตฺถเมตํ, อตฺตโน โมกฺขธมฺมํ คเวสิตุํ วฏฺฏตี'ติ อิมํ จินฺตยนฺโต นิสินฺโนมฺหิ, ตฺวํ ปน กสฺมา อนตฺตมโน อโหสีติ. ๓- โสปิ ตเถว อาห. อถสฺส อตฺตนา สทฺธึ เอกชฺฌาสยตํ ญตฺวา อุปติสฺโส ตํ เอวมาห "อมฺหากํ อุภินฺนํปิ จินฺติตํ สุจินฺติตํ, โมกฺขธมฺมํ คเวสนฺเตหิ เอกํ ปพฺพชฺชํ ๔- ลทฺธุํ วฏฺฏติ, กสฺส สนฺติเก ปพฺพชามา"ติ.

เตน โข ปน สมเยน สญฺชโย ๕- ปริพฺพาชโก ราชคเห ปฏิวสติ มหติยา ปริพฺพาชกปริสาย สทฺธึ. เต "ตสฺส สนฺติเก ปพฺพชิสฺสามา"ติ ปญฺจหิ มาณวกสเตหิ สทฺธึ สญฺชยสฺส สนฺติเก ปพฺพชึสุ. เตสํ ปพฺพชิตกาลโต ปฏฺฐาย สญฺชโย อติเรกลาภคฺคยสคฺคปฺปตฺโต อโหสิ. เต กติปาเหเนว สพฺพํ สญฺชยสฺส สมยํ