มหากสฺสปตฺเถรวตฺถุ
[๑๙๑] จตุตฺเถ ธุตวาทานนฺติ เอตฺถ ธุโต เวทิตพฺโพ, ธุตวาโท เวทิตพฺโพ, ธุตธมฺมา เวทิตพฺพา, ธุตงฺคานิ เวทิตพฺพานิ. ตตฺถ ธุโตติ ธุตกิเลโส วา ปุคฺคโล กิเลเส ธุนนฺโต วา ๑- ธมฺโม.
ธุตวาโทติ เอตฺถ ปน อตฺถิ ธุโต น ธุตวาโท, อตฺถิ น ธุโต ธุตวาโท, อตฺถิ เนว ธุโต น ธุตวาโท, อตฺถิ ธุโต เจว ธุตวาโท จ. ตตฺถ โย ธุตงฺเคน อตฺตโน กิเลเส ธุนิ, ปรมฺปน ธุตงฺเคน น โอวทติ นานุสาสติ พกฺกุลตฺเถโร ๒- วิย, อยํ ธุโต น ธุตวาโท. ยถาห "ตยิทํ ๓- อายสฺมา พกฺกุโล ธุโต น ธุตวาโท"ติ. โย ปน ธุตงฺเคน อตฺตโน กิเลเส น ธุนิ, เกวลํ อญฺเญ ธุตงฺเคน โอวทติ อนุสาสติ อุปนนฺทตฺเถโร วิย, อยมฺปน น ธุโต ธุตวาโท. ยถาห "ตยิทํ อายสฺมา อุปนนฺโท สกฺยปุตฺโต น ธุโต ธุตวาโท"ติ. ๔- โย ปน ธุตงฺเคน อตฺตโน กิเลเส น ธุนิ, อญฺเญ ธุตงฺเคน น โอวทติ นานุสาสติ โลลุทายิตฺเถโร วิย, ๔- อยมฺปน เนว ธุโต น ธุตวาโท. ยถาห "ตยิทํ อายสฺมา มหาโลลุทายี ๕- เนว ธุโต น ธุตวาโท"ติ. โย ปน อุภยสมฺปนฺโน อายสฺมา มหากสฺสปตฺเถโร วิย, อยํ ธุโต เจว ธุตวาโท จ. ยถาห "ตยิทํ อายสฺมา มหากสฺสโป ธุโต เจว ธุตวาโท จา"ติ.
ธุตธมฺมา เวทิตพฺพาติ อปฺปิจฺฉตา สนฺตุฏฺฐิตา สลฺเลขตา ปวิเวกตา อิทมตฺถิตาติ อิเม ธุตงฺเค เจตนาย ปริวารา ปญฺจธมฺมา "อปฺปิจฺฉํเยว