เอวํ กาเล คจฺฉนฺเต เอกทิวสํ เทวี รญฺโญ สมฺปตฺตึ ๖- ทิสฺวา "อโห วต ตปสฺสี"ติ ๗- การุญฺญาการํ ทสฺเสสิ. "กิมิทํ เทวี"ติ จ ปุฏฺฐา "อติมหตี เต เทว สมฺปตฺติ, อตีเต พุทฺธานํ สทฺทหิตฺวา กลฺยาณํ กริตฺถ, อิทานิ อนาคตสฺส ปจฺจยํ กุสลํ น กโรถา"ติ อาห. กสฺส ทสฺสามิ, สีลวนฺโต นตฺถีติ. "อสุญฺโญ เทว ชมฺพูทีโป อรหนฺเตหิ, ตุเมฺห ทานเมว สชฺเชถ, อหํ อรหนฺเต ยาจามี"ติ ๘- อาห. ราชา ปุนทิวเส ปาจีนทฺวาเร ทานํ สชฺชาเปสิ. เทวี ปาโตว อุโปสถงฺคานิ อธิฏฺฐาย อุปริปาสาเท ปุรตฺถาภิมุขา อุเรน นิปชฺชิตฺวา "สเจ เอติสฺสา ทิสายํ อรหนฺโต อตฺถิ, เสฺว อาคนฺตฺวา อมฺหากํ ภิกฺขํ คณฺหนฺตู"ติ อาห. ตสฺสํ ทิสายํ อรหนฺโต นาเหสุํ, ตํ สกฺการํ กปณยาจกานํ อทํสุ.

ปุนทิวเส ทกฺขิณทฺวาเร ทานํ สชฺเชตฺวา ตเถว อกาสิ, ปุนทิวเส ปจฺฉิมทฺวาเร. อุตฺตรทฺวาเร ปน สชฺชิตทิวเส เทวิยา ตเถว นิมนฺติเต หิมวนฺเต วสนฺตานํ ปทุมวติยา ปุตฺตานํ ปญฺจสตานํ ปจฺเจกพุทฺธานํ เชฏฺฐโก มหาปทุมปจฺเจกพุทฺโธ ภาติเก อามนฺเตสิ "มาริสา นนฺทราชา ตุเมฺห นิมนฺเตติ, อธิวาเสถ ตสฺสา"ติ.

@๔ ฉ.ม.,อิ. จตสฺโสปิ ทิสา ๕ ฉ.ม. สพฺพทิสาสุ อฏฺฐฏฺฐ ๖ ฉ.ม.,อิ. มหาสมฺปตฺตึ