@๕ ฉ.ม. เอกมนฺเต ๖ ฉ.ม. กมฺปิตฺถ ๗ ฉ.ม. เอวํ ถทฺธํ นาม มหาคีวํ ทิสฺวา

@๘ ม. นิวาสนปฏิคฺคาหิกาปิ ๙ ฉ.ม. อยฺยธีตา

พฺราหฺมโณ ปฏิสนฺถารํ กตฺวา "กุโต อาคตตฺถา"ติ ปุจฺฉิ. มคธรฏฺเฐ มหาติตฺถคาเม กปิลพฺราหฺมณสฺส ฆรโตติ. กึการณา อาคตาติ. อิมินา นาม การเณนาติ. "กลฺยาณํ ตาตา, สมานชาติโคตฺตวิภโว อมฺหากํ พฺราหฺมโณ, ทสฺสาม ๑- ทาริกนฺ"ติ ปณฺณาการํ คณฺหิ. เต กปิลพฺราหฺมณสฺส สาสนํ ปหิณึสุ "ลทฺธา ทาริกา, กตฺตพฺพํ กโรถา"ติ. ตํ สาสนํ สุตฺวา ปิปฺผลิมาณวสฺส อาโรจยึสุ "ลทฺธา กิร ทาริกา"ติ. มาณโว "อหํ น ลภิสฺสนฺตีติ จินฺเตสึ, อิเม ลทฺธาติ วทนฺติ, อนตฺถิโก หุตฺวา ปณฺณํ เปเสสฺสามี"ติ รโหคโต ปณฺณํ ลิขิ "ภทฺทา อตฺตโน ชาติโคตฺตโภคานุรูปํ ฆราวาสํ ลภตุ, อหํ นิกฺขมิตฺวา ปพฺพชิสฺสามิ, มา ปจฺฉา วิปฺปฏิสารินี อโหสี"ติ. ภทฺทาปิ "อสุกสฺส กิร มํ ทาตุกาโม"ติ สุตฺวา รโหคตา ปณฺณํ ลิขิ "อยฺยปุตฺโต อตฺตโน ชาติโคตฺตโภคานุรูปํ ฆราวาสํ ลภตุ, อหํ นิกฺขมิตฺวา ปพฺพชิสฺสามิ, มา ปจฺฉา วิปฺปฏิสารี อโหสี"ติ. เทฺว ปณฺณานิ อนฺตรามคฺเค สมาคจฺฉึสุ. อิทํ กสฺส ปณฺณนฺติ. ปิปฺผลิมาณเวน ภทฺทาย ปหิตนฺติ. อิทํ กสฺสาติ. ภทฺทาย ปิปฺผลิมาณวสฺส ปหิตนฺติ จ วุตฺเต เทฺวปิ วาเจตฺวา "ปสฺสถ ทารกานํ กมฺมนฺ"ติ ผาเลตฺวา อรญฺเญ ฉฑฺเฑตฺวา สมานปณฺณํ ลิขิตฺวา อิโต จ เอตฺโต จ เอเตสํ ๒- เปเสสุํ. อิติ เตสํ อนิจฺฉมานานํเยว สมาคโม อโหสิ.