@จุทฺทส คามา ๔ สี.,อิ. อลงฺกตรถํ, อลงฺกตอสฺสํ ๕ ฉ.ม. กึ จุทฺทส คามา อาคจฺฉนฺตี กิตฺตกํ ธนํ อาหรี"ติ. ปญฺจปณฺณาส สกฏสหสฺสานิ อยฺยาติ. เอตํ สพฺพํ, ยา จ อิมสฺมึ ฆเร สตฺตาสีติโกฏิโย ยนฺตพทฺธา สฏฺฐิตฬากาทิเภทา จ สมฺปตฺติ อตฺถิ, สพฺพํ ตุยฺหํเยว นิยฺยาเทมีติ. ตุเมฺห ปน กุหึ คจฺฉถ อยฺยาติ. อหํ ปพฺพชิสฺสามีติ. อหํปิ ตุมฺหากํเยว อาคมนํ โอโลกยมานา นิสินฺนา, อหํปิ ปพฺพชิสฺสามีติ. เตสํ อาทิตฺตปณฺณกุฏิ วิย ตโย ภวา อุปฏฺฐหึสุ. เต อนฺตราปณโต กาสายานิ ๑- วตฺถานิ มตฺติกาปตฺเต จ อาหราเปตฺวา อญฺญมญฺญํ เกเส โอหาราเปตฺวา "เย โลเก อรหนฺโต, เต อุทฺทิสฺส อมฺหากํ ปพฺพชฺชา"ติ วตฺวา ถวิกาย ปตฺเต โอสาเรตฺวา ๒- อํเส ลคฺเคตฺวา ปาสาทโต โอตรึสุ. เคเห ทาเสสุ วา กมฺมกาเรสุ วา น โกจิ สญฺชานิ.

อถ เน พฺราหฺมณคามโต นิกฺขมฺม ทาสคามทฺวาเรน คจฺฉนฺเต อากปฺปกุตฺตวเสน ทาสคามวาสิโน สญฺชานึสุ. เต โรทนฺตา ปาเทสุ นิปติตฺวา "กึ อเมฺห อนาเถ กโรถ อยฺยา"ติ อาหํสุ. "มยํ ภเณ อาทิตฺตปณฺณสาลา วิย ตโย ภวาติ ปพฺพชิมฺหา, สเจ ตุเมฺหสุ เอเกกํ ภุชิสฺสํ กโรม, วสฺสสตมฺปิ นปฺปโหติ. ตุเมฺห จ ๓- ตุมฺหากํ สีสํ โธวิตฺวา ภุชิสฺสา หุตฺวา ชีวถา"ติ วตฺวา เตสํ โรทนฺตานํเยว ปกฺกมึสุ. เถโร ปุรโต คจฺฉนฺโต นิวตฺติตฺวา โอโลเกนฺโต จินฺเตสิ "อยํ ภทฺทา กาปิลานี สกลชมฺพูทีปคฺฆนิกา อิตฺถี มยฺหํ ปจฺฉโต อาคจฺฉติ. ฐานํ โข ปเนตํ วิชฺชติ, ยํ โกจิเทว เอวํ จินฺเตยฺย `อิเม ปพฺพชิตฺวาปิ วินา ภวิตุํ น สกฺโกนฺติ, อนนุจฺฉวิกํ กโรนฺตี'ติ. โกจิ นาม ๔- อเมฺหสุ มนํ ปทูเสตฺวา อปายปูรโก ภเวยฺย. ๕- อิมํ ปหาย มยา คนฺตุํ วฏฺฏตี"ติ จิตฺตํ อุปฺปาเทสิ.

โส ปุรโต คจฺฉนฺโต เทฺวธาปถํ ทิสฺวา ตสฺส มตฺถเก อฏฺฐาสิ. ภทฺทาปิ อาคนฺตฺวา วนฺทิตฺวา อฏฺฐาสิ. อถ นํ อาห "ภทฺเท ตาทิสึ อิตฺถึ มม ปจฺฉโต อาคจฺฉนฺตึ ทิสฺวา `อิเม ปพฺพชิตฺวาปิ วินา ภวิตุํ น สกฺโกนฺตี'ติ จินฺเตตฺวา