อนฺนภารสฺส ปุญฺญํ อาคมฺม ราชา เสฏฺฐึ อโนโลเกตฺวา อนฺนภารเมว โอโลเกสิ. กึ เทว อิมํ ปุริสํ อติวิย โอโลเกสีติ. อญฺญํ ทิวสํ อทิฏฺฐปุพฺพตฺตา โอโลเกมีติ. โอโลเกตพฺพยุตฺตโก เอส เทวาติ. โก ปนสฺส โอโลเกตพฺพยุตฺตโก คุโณติ. อชฺช อตฺตโน ภาคภตฺตํ สยํ อภุญฺชิตฺวา อุปริฏฺฐปจฺเจกพุทฺธสฺส ทินฺนตฺตา มม หตฺถโต สหสฺสํ ลภิ เทวาติ. โก นาม เอโสติ. อนฺนภาโร นาม เทวาติ. "ตว หตฺถโต ลทฺธตฺตา มมาปิ หตฺถโต ลทฺธุํ อรหติ, อหมฺปิสฺส ปูชํ กริสฺสามี"ติ วตฺวา สหสฺสํ อทาสิ. เอตสฺส วสนเคหํ ชานาถ ภเณติ. สาธุ เทวาติ. เต เอตํ เคหฏฺฐานํ โสเธตฺวา ๒- กุทฺทาเลน อาหตาหตฏฺฐาเน ปิงฺคลนิธิกุมฺภิโย ๓- คีวาย คีวํ อาหจฺจ ฐิตา ทิสฺวา รญฺโญ อาโรจยึสุ. ราชา "เตนหิ คนฺตฺวา ขนถา"ติ อาห. เตสํ ขนนฺตานํ ขนนฺตานํ เหฏฺฐา คจฺฉนฺติ. ปุน คนฺตฺวา รญฺโญ อาโรจยึสุ. ราชา "อนฺนภารสฺส วจเนน ขนถา"ติ อาห. เต คนฺตฺวา อนฺนภารสฺส วจเนน ๔- ขนึสุ. กุทฺทาเลน อาหตาหตฏฺฐาเน อหิจฺฉตฺตกมกุลานิ วิย กุมฺภิโย อุฏฺฐหึสุ. เต ธนํ อาหริตฺวา รญฺโญ สนฺติเก ราสึ อกํสุ. ราชา อมจฺเจ สนฺนิปาเตตฺวา "อิมสฺมึ นคเร กสฺส ๕- เอตฺตกํ ธนํ อตฺถี"ติ ปุจฺฉิ. นตฺถิ กสฺสจิ เทวาติ. เตนหิ อยํ อนฺนภาโร อิมสฺมึ นคเร ธนเสฏฺฐี นาม โหตูติ. ตํทิวสเมว เสฏฺฐิจฺฉตฺตํ ลภิ.

@วจนนฺติ ๕ ฉ.ม. อญฺญสฺส

โส ตโต ปฏฺฐาย ยาวชีวํ กลฺยาณกมฺมํ กตฺวา ตโต จุโต เทวโลเก นิพฺพตฺโต. ทีฆรตฺตํ เทวมนุสฺเสสุ สํสริตฺวา อมฺหากํ สตฺถุ อุปฺปชฺชนกาเล กปิลวตฺถุนคเร อมิโตทนสฺส ๑- สกฺกสฺส เคเห ปฏิสนฺธึ คณฺหิ. นามคหณทิวเสปิสฺส มนุสฺสา อนุรุทฺโธติ นามํ อกํสุ. มหานามสกฺกสฺส กนิฏฺฐภาตา สตฺถุ จุลฺลปิตุปุตฺโต ปรมสุขุมาโล มหาปุญฺโญ อโหสิ. สุวณฺณปาติยํเยวสฺส ภตฺตํ อุปฺปชฺชิ. อถสฺส มาตา เอกทิวสํ "มม ปุตฺตํ นตฺถีติ ปทํ ชานาเปสฺสามี"ติ เอกํ สุวณฺณปาตึ อญฺญาย สุวณฺณปาติยา ๒- ปิทหิตฺวา ตุจฺฉกํเยว เปเสสิ, อนฺตรามคฺเค เทวตา ทิพฺพปูเวหิ ปูเรสุํ. เอวํ มหาปุญฺโญ อโหสิ. ติณฺณํ อุตูนํ อนุจฺฉวิเกสุ ตีสุ ปาสาเทสุ อลงฺกตนาฏกิตฺถีหิ ปริวุโต เทโว วิย สมฺปตฺตึ อนุภวิ.