โปราณา ปน วณฺณยนฺติ:- "ตสฺมึ สมเย"ติ วา "เตน สมเยนา"ติ วา "เอกํ ๑- สมยนฺ"ติ วา อภิลาปมตฺตเภโท เอส, สพฺพตฺถ ภุมฺมเมว อตฺโถติ. ตสฺมา "เอกํ สมยนฺ"ติ วุตฺเตปิ "เอกสฺมึ สมเย"ติ อตฺโถ เวทิตพฺโพ.

ภควาติ ครุวจนํ. ๒- ครุญฺหิ โลเก "ภควา"ติ วทนฺติ. อยญฺจ สพฺพคุณวิสิฏฺฐตาย สพฺพสตฺตานํ ครุ, ตสฺมา "ภควา"ติ เวทิตพฺโพ. โปราเณหิปิ วุตฺตํ:-

"ภควาติ วจนํ เสฏฺฐํ ภควาติ วจนมุตฺตมํ

ครุ คารวยุตฺโต โส ภควา เตน วุจฺจตี"ติ. ๓-