จณฺฑปชฺโชตราชา อมจฺเจ สนฺนิปาเตตฺวา อาห "พุทฺโธ โลเก นิพฺพตฺโต, ตํ อาเนตุํ สมตฺถา คนฺตฺวา อาเนถ ตาตา"ติ. เทว อญฺโญ จ ๑- ทสพลํ อาเนตุํ สมตฺโถ นาม นตฺถิ, อาจริโย กจฺจายนพฺราหฺมโณว สมตฺโถ, ตํ ปหิณถาติ. ราชา ตํ ปกฺโกสาเปตฺวา "ตาต ทสพลสฺส สนฺติกํ คจฺฉาหี"ติ อาห. คนฺตฺวา ปพฺพชิตุํ ลภนฺโต คมิสฺสามิ มหาราชาติ. ยงฺกิญฺจิ กตฺวา ตถาคตํ อาเนหิ ตาตาติ. โส "พุทฺธานํ สนฺติกํ คจฺฉนฺตสฺส มหาปริสาย กมฺมํ นตฺถี"ติ อตฺตฏฺฐโม อคมาสิ. อถสฺส สตฺถา ธมฺมํ เทเสสิ. เทสนาปริโยสาเน สทฺธึ สตฺตหิ ชเนหิ สห ปฏิสมฺภิทาหิ อรหตฺตํ ปาปุณิ. สตฺถา "เอถ ภิกฺขโว"ติ หตฺถํ ปสาเรสิ. ตํขณญฺเญว สพฺเพว อนฺตรหิตเกสมสฺสู อิทฺธิมยปตฺตจีวรธรา วสฺสสติกตฺเถรา วิย ชาตา.

เถโร อตฺตโน กิจฺเจ มตฺถกํ ปตฺเต ตุณฺหีภาเวน อนิสีทิตฺวา กาฬุทายิตฺเถโร วิย สตฺถุ อุชฺเชนิคมนตฺถาย คมนวณฺณํ ๒- กเถสิ. สตฺถา ตสฺส วจนํ สุตฺวา "กจฺจายโน อตฺตโน ชาติภูมิยํ มม คมนํ ๓- ปจฺจาสึสตี"ติ อญฺญาสิ. พุทฺธา จ นาม เอกํ การณํ ปฏิจฺจ คนฺตุํ อยุตฺตฏฺฐานํ น คจฺฉนฺติ. ตสฺมา เถรํ อาห "ตฺวํเยว ภิกฺขุ คจฺฉ, ตยิ คเตปิ ราชา ปสีทิสฺสตี"ติ. เถโร "พุทฺธานํ เทฺว กถา นาม นตฺถี"ติ ตถาคตํ วนฺทิตฺวา อตฺตนา สทฺธึ อาคเตเหว สตฺตหิ ภิกฺขูหิ สทฺธึ อุชฺเชนึ คจฺฉนฺโต อนฺตรามคฺเค เตสํ จ นาลิ ๔- นาม นิคโม, ตตฺถ ปิณฺฑาย จริ. ตสฺมิมฺปิ ๕- นิคเม เทฺว เสฏฺฐิธีตโร. ตาสุ เอกา ปริชิณฺณกุเล นิพฺพตฺตา ทุคฺคตา มาตาปิตูนํ อจฺจเยน ธาตึ นิสฺสาย ชีวติ. อตฺตภาโว ปนสฺสา สมิทฺโธ, เกสา อญฺญาหิ อติวิย ทีฆา. ตสฺมึเยว นิคเม อญฺญา อิสฺสรเสฏฺฐิกุลสฺส ธีตา นิกฺเกสิกา, สา ตโต ปุพฺเพ ตสฺสา สมีปํ เปเสตฺวา "สตํ วา สหสฺสํ วา ทสฺสามี"ติ วตฺวาปิ เกเส อาหราเปตุํ นาสกฺขิ.

@๔ สี.,ฉ.ม. เตลปนาฬิ ๕ ฉ.ม.,อิ. ตสฺมึ จ