ตสฺมึ ปน ทิวเส สา เสฏฺฐิธีตา มหากจฺจายนตฺเถรํ สตฺตหิ ภิกฺขูหิ ปริวุตํ ตุจฺฉปตฺตํ คจฺฉนฺตํ ๑- ทิสฺวา "อยํ สุวณฺณวณฺโณ เอโก พฺราหฺมณพนฺธุภิกฺขุ ยถาโธเตเนว ปตฺเตน คจฺฉติ, ๒- มยฺหญฺจ อญฺญํ ธนํ นตฺถิ. อสุกเสฏฺฐิธีตา ปน อิเมสํ เกสานํ อตฺถาย เปเสสิ. อิทานิ อิโต ลทฺธอุปฺปาเทน สกฺกา เถรสฺส เทยฺยธมฺมํ ทาตุนฺ"ติ ธาตึ เปเสตฺวา เถเร นิมนฺเตตฺวา อนฺโตเคเห นิสีทาเปสิ. เถรานํ นิสินฺนกาเล คพฺภํ ปวิสิตฺวา ธาติยา อตฺตโน เกเส กปฺปาเปตฺวา "อมฺม อิเม เกเส อสุกาย นาม เสฏฺฐิธีตาย ทตฺวา ยํ สา เทติ, ตํ อาหร, อยฺยานํ ปิณฺฑปาตํ ทสฺสามา"ติ. ธาตี ปิฏฺฐิหตฺเถน อสฺสูนิ ปุญฺฉิตฺวา เอเกน หตฺเถน หทยมํสํ สนฺธาเรตฺวา เถรานํ สนฺติเก ปฏิจฺฉาเทตฺวา เต เกเส อาทาย ตสฺสา เสฏฺฐิธีตาย สนฺติกํ คตา.

ปณีตํ ๓- นาม สารวนฺตํปิ สยํ อุปนีตํ คารวํ น ชเนติ, ตสฺมา เสฏฺฐิธีตา จินฺเตสิ "อหํ ปุพฺเพ พหุนาปิ ธเนน อิเม เกเส อาหราเปตุํ นาสกฺขึ, อิทานิ ปน ฉินฺนกาลโต ปฏฺฐาย น ยถามูลเมว ลจฺฉิสฺสตี"ติ ธาตึ อาห "อหํ ปุพฺเพ ตว สามินิยา ๔- พหุนาปิ ธเนน เกเส อาหราเปตุํ นาสกฺขึ, ยตฺถ กตฺถจิ นีตา ปน น ชีวเกสา ๕- นาม อฏฺฐ กหาปเณ อคฺฆนฺตี"ติ อฏฺเฐว กหาปเณ อทาสิ. ธาตี กหาปเณ อาหริตฺวา เสฏฺฐิธีตาย อทาสิ. เสฏฺฐิธีตา เอเกกํ ปิณฺฑปาตํ เอเกกํ กหาปณิกํ กตฺวา เถรานํ ทาเปสิ. เถโร อาวชฺชิตฺวา เสฏฺฐิธีตาย อุปนิสฺสยํ ทิสฺวา "กหํ เสฏฺฐิธีตา"ติ ปุจฺฉิ. คพฺเภ อยฺยาติ. ปกฺโกสถ นนฺติ. สา เถเรสุ คารเวน เอกวจเนน อาคนฺตฺวา เถเร วนฺทิตฺวา พลวสทฺธํ อุปฺปาเทสิ. สุเขตฺเต ปติฏฺฐิตปิณฺฑปาโต ทิฏฺเฐว ธมฺเม วิปากํ เทตีติ สห เถรานํ วนฺทเนน เกสา ปกติภาเวเยว อฏฺฐํสุ. เถราปิ ตํ ปิณฺฑปาตํ คเหตฺวา ปสฺสนฺติยาเยว เสฏฺฐิธีตาย เวหาสํ อพฺภุคฺคนฺตฺวา กาญฺจนวนุยฺยาเน โอตรึสุ.

@๕ สี. นีตา ปน ชีวเกสา, ฉ.ม. วินิปาตา ปน นิชฺชีวเกสา