@๕ ฉ.ม. ปุน ๖ สี.,อิ. มโนมยญาณลาภี, ฉ.ม. มโนมยชฺฌานลาภี

ปุนทิวเส สตฺถา เอกูเนหิ ปญฺจหิ ภิกฺขุสเตหิ สทฺธึ คนฺตฺวา ชีวกสฺส นิเวสเน นิสีทิ. จูฬปนฺถโก ปน อตฺตโน ภิกฺขาย อปฺปฏิจฺฉิตตฺตาเยว น คโต. ชีวโก ยาคุํ ทาตุํ อารภิ, สตฺถา หตฺเถน ปตฺตํ ปิทหิ. กสฺมา ภนฺเต น คณฺหถาติ. วิหาเร เอโก ภิกฺขุ อตฺถิ ชีวกาติ. โส ปุริสํ ปหิณิ "คจฺฉ ภเณ วิหาเร นิสินฺนํ อยฺยํ คเหตฺวา เอหี"ติ. จูฬปนฺถกตฺเถโรปิ ตสฺส ปุริสสฺส ปุเร อาคมนาเยว ภิกฺขุสหสฺสํ นิมฺมินิตฺวา เอกํปิ เอเกน อสทิสํ, เอกสฺสาปิ จีวรวิจารณาทิสมณกมฺมํ อญฺเญน อสทิสํ อกาสิ. โส ปุริโส วิหาเร ภิกฺขูนํ พหุภาวํ ทิสฺวา คนฺตฺวา ชีวกสฺส กเถสิ "ภนฺเต อิมสฺมึ วิหาเร ภิกฺขุสํโฆ พหุตโร, ตโต ปกฺโกสิตพฺพํ ภทนฺตํ น ชานามี"ติ. ชีวโก สตฺถารํ ปฏิปุจฺฉิ "โก นาม ภนฺเต วิหาเร ๑- นิสินฺโน ภิกฺขู"ติ. จูฬปนฺถโก นาม ชีวกาติ. คจฺฉ ภเณ "จูฬปนฺถโก นาม กตโร"ติ ปุจฺฉิตฺวา อาเนหีติ. โส วิหารํ อาคนฺตฺวา "จูฬปนฺถโก นาม ภนฺเต กตโร"ติ ปุจฺฉิ. "อหํ จูฬปนฺถโก อหํ จูฬปนฺถโก"ติ ภิกฺขุสหสฺสํ กเถสิ. โส ปุน คนฺตฺวา ชีวกํ กเถสิ "สหสฺสมตฺตา ภิกฺขู สพฺเพ `อหํ จูฬปนฺถโก อหํ จูฬปนฺถโก'ติ กเถนฺติ, อหํ `อสุโก นาม ปกฺโกสิตพฺโพ'ติ น ชานามี"ติ. ชีวโกปิ ปฏิวิทฺธสจฺจตาย "อิทฺธิมา ภิกฺขู"ติ นยโต ญตฺวา "ปฐมกถนภิกฺขุเมว `ตุเมฺห สตฺถา ปกฺโกสตี'ติ วตฺวา จีวรกณฺเณ คณฺหถ ตาตา"ติ อาห. โส วิหารํ คนฺตฺวา ตถา อกาสิ, ตาวเทว สหสฺสมตฺตา ภิกฺขู อนฺตรธายึสุ. โส เถรํ คเหตฺวา อคมาสิ. สตฺถา ตสฺมึ ขเณ ยาคุํ คณฺหิ.

ทสพเล ภตฺตกิจฺจํ กตฺวา วิหารํ คเต ธมฺมสภายํ กถา อุทปาทิ "ยาวมหนฺตา วต พุทฺธา นาม จตฺตาโร มาเส เอกํ คาถํ คณฺหิตุํ อสกฺโกนฺตํ ภิกฺขุํ เอวํ มหิทฺธิกํ อกํสู"ติ. สตฺถา เตสํ ภิกฺขูนํ จิตฺตวารํ ญตฺวา คนฺตฺวา ปญฺญตฺตาสเน นิสชฺช "กึ วเทถ ภิกฺขเว"ติ ปุจฺฉิ. น ภควา อญฺญํ กิญฺจิ กเถม, จูฬปนฺถเกน ตุมฺหากํ สนฺติกา มหาลาโภ ลทฺโธติ ตุมฺหากํเยว คุณํ กเถมาติ.