อิมินาว นิยาเมน สตฺถา สกฺการสมฺมานํ อนุภวนฺโต เทวสิกํ โยชนปรมํ คนฺตฺวา ตึสโยชนิกํ กนฺตารํ อติกฺกมฺม ขทิรวนิยตฺเถรสฺส สภาคฏฺฐานํ ๓- ปตฺโต, เถโร สตฺถุ อาคมนํ ญตฺวา อตฺตโน วสนฏฺฐาเน พุทฺธปฺปมุขสฺส ภิกฺขุสํฆสฺส ปโหนกวิหาเร ทสพลสฺส คนฺธกุฏึ รตฺติฏฺฐานทิวาฏฺฐานาทีนิ จ อิทฺธิยา มาเปตฺวา ตถาคตสฺส ปจฺจุคฺคมนํ คโต. สตฺถา อลงฺกตปฏิยตฺเตน มคฺเคน วิหารํ ปาวิสิ. อถ ตถาคเต คนฺธกุฏิยํ ๔- ปวิฏฺเฐ ภิกฺขู วสฺสคฺเคน ปตฺตเสนาสนานิ ปวิสึสุ. เทวตา "อกาโล อาหารสฺสา"ติ อฏฺฐวิธํ ปานกํ อาหรึสุ. สตฺถา ภิกฺขุสํเฆน สทฺธึ ปานกํ ปิวิ. อิมินาว นิยาเมน ตถาคตสฺส สกฺการสมฺมานํ อนุภวนฺตสฺเสว อฑฺฒมาโส อติกฺกนฺโต.
อเถกจฺเจ อุกฺกณฺฐิตภิกฺขู ๑- เอกสฺมึ ฐาเน นิสีทิตฺวา กถํ อุปฺปาทยึสุ "สตฺถา ทสพโล `มยฺหํ อคฺคสาวกสฺส กนิฏฺฐภาตา'ติ วตฺวา เอวรูปํ นวกมฺมิกํ ภิกฺขุํ ปสฺสิตุํ อาคโต, อิมสฺส วิหารสฺส สนฺติเก เชตวนมหาวิหาโร วา เวฬุวนมหาวิหาราทโย วา กึ กริสฺสนฺติ. อยํปิ ภิกฺขุ เอวรูปสฺส นวกมฺมสฺส การโก, กึ นาม สมณธมฺมํ กริสฺสตี"ติ. อถ สตฺถา จินฺเตสิ "มยิ จิรํ วสนฺเต อิทํ ฐานํ อากิณฺณํ ภวิสฺสติ, อารญฺญกภิกฺขู นาม ปวิเวกตฺถิกา โหนฺติ, เรวตสฺส อผาสุวิหาโร ภวิสฺสตี"ติ ตโต เรวตสฺส ทิวาฏฺฐานํ คโต. เถโร เอกโกว จงฺกมนโกฏิยํ อาลมฺพนผลกํ ๒- นิสฺสาย ปาสาณผลเก นิสินฺโน สตฺถารํ ทูรโตว อาคจฺฉนฺตํ ทิสฺวา ปจฺจุคฺคนฺตฺวา วนฺทิ.
อถ นํ สตฺถา ปุจฺฉิ "เรวต อิมํ วาฬมิคฏฺฐานํ, จณฺฑานํ หตฺถิอสฺสาทีนํ สทฺทํ สุตฺวา กินฺติ กโรสี"ติ. เตสํ เม ภนฺเต สทฺทํ สุณโต อรญฺญสฺมึ ปีติ นาม ๓- อุปฺปชฺชตีติ. สตฺถา อิมสฺมึ ๔- ฐาเน เรวตตฺเถรสฺส ปญฺจหิ คาถาสเตหิ อรญฺญปสํสํ ๕- นาม กเถตฺวา ปุนทิวเส อวิทูเร ฐาเน ปิณฺฑาย จริตฺวา เรวตตฺเถรํ อามนฺเตตฺวา ๖- เยหิ ภิกฺขูหิ เถรสฺส อวณฺโณ กถิโต, เตสํ กตฺตรยฏฺฐิอุปาหนเตลนาฬิจฺฉตฺตานํ ปมฺมุสฺสนภาวํ อกาสิ. เต อตฺตโน ปริกฺขารตฺถาย นิวตฺตา อาคตมคฺเคเนว คจฺฉนฺตา ฐปิตฏฺฐานํ สลฺลกฺเขตุํ น สกฺโกนฺติ. ปฐมมฺหิ เต อลงฺกตปฏิยตฺเตน มคฺเคน คนฺตฺวา ตํ ทิวสํ ปน วิสมมคฺเคน คจฺฉนฺตา ตสฺมึ ตสฺมึ ฐาเน อุกฺกุฏิกํ นิสีทนฺติ, ชณฺณุเกน คจฺฉนฺติ. เต คุมฺเพ คจฺเฉ กณฺฏเก จ มทฺทนฺตา อตฺตโน วสิตํ สภาคฏฺฐานํ คนฺตฺวา ตสฺมึ ตสฺมึ ขทิรขาณุเก อตฺตโน ฉตฺตํ สญฺชานนฺติ, อุปาหนกตฺตรยฏฺฐิเตลนาฬึ สญฺชานนฺติ. เต ตสฺมึ สมเย "อิทฺธิมา อยํ ภิกฺขู"ติ ญตฺวา อตฺตโน ปริกฺขาเร อาทาย "ทสพลสฺส ปฏิยตฺตสกฺกาโร นาม เอวรูโป โหตี"ติ วทนฺตา อคมํสุ.