เหมวโตปิ ติโยชนสหสฺสํ หิมวนฺตํ อกาลปุปฺผิตํ ทิสฺวา "มม สหาเยน สาตาคิเรน สทฺธึ หิมวนฺตกีฬํ ๒- กีฬิสฺสามี"ติ อตฺตโน ปริสาย สทฺธึ ราชคหมตฺถเกเนว ปายาสิ. เตสํ ทฺวินฺนํปิ อคฺคพลกายา กุลฆริกาย กาฬิยา อุปาสิกาย นิเวสนมตฺถเก สมาคนฺตฺวา "ตุเมฺห กสฺส ปริสา, ๓- มยํ สาตาคิรสฺส. ตุเมฺห กสฺส ปริสา, มยํ เหมวตสฺสา"ติ อาหํสุ. เต หฏฺฐตุฏฺฐาว คนฺตฺวา เตสํ ยกฺขเสนาปตีนํ อาโรจยึสุ. เตปิ ตํขณญฺเญว อุปาสิกาย นิเวสนมตฺถเก สมาคจฺฉึสุ. สาตาคิโร เหมวตํ อาห "กหํ สมฺม คจฺฉสี"ติ. ตว สนฺติกํ สมฺมาติ. กึการณาติ. หิมวนฺตํ สุปุปฺผิตํ ทิสฺวา ตยา สทฺธึ ตตฺถ กีฬิสฺสามีติ. ตฺวํ ปน สมฺม กหํ คจฺฉสีติ. หิมวนฺตสฺส เกน ปุปฺผิตภาวํ ชานาสีติ. น ชานามิ สมฺมาติ. สุทฺโธทนมหาราชสฺส ปุตฺโต สิทฺธตฺถกุมาโร ทสสหสฺสีโลกธาตุํ กมฺเปตฺวา ปฏิวิทฺธสพฺพญฺญุตญาโณ ทสสหสฺสจกฺกวาฬเทวตานํ มชฺเฌ อนุตฺตรํ ธมฺมจกฺกํ ปวตฺเตสิ, ตสฺส ปวตฺติตภาวํ น ชานาสีติ. น ชานามิ สมฺมาติ. ตฺวํ เอตฺตกเมว ฐานํ ปุปฺผิตํ วณฺเณสิ, ๔- ตสฺส ปน ปุริสสฺส สกฺการตฺถาย สกลทสสหสฺสจกฺกวาฬํ เอกมาลาคุลสทิสํ อชฺช ชาตํ สมฺมาติ. มาลา ตาว ปุปฺผนฺตุ, ตยา โส สตฺถา อกฺขีนิ ปูเรตฺวา ทิฏฺโฐติ. อาม สมฺม เหมวต สตฺถา จ เม ทิฏฺโฐ, ธมฺโม จ สุโต, อมตญฺจ ปีตํ. อหํ "เอตํ อมตธมฺมํ ตํปิ ชานาเปสฺสามี"ติ ตว สนฺติกํ อหํ อาคโตสฺมิ สมฺมาติ. เตสํ อญฺญมญฺญํ กเถนฺตานํเยว อุปาสิกา สิริสยนโต อุฏฺฐาย นิสินฺนา ตํ กถาสลฺลาปํ สุตฺวา สทฺเท นิมิตฺตํ คณฺหิ. "อยํ สทฺโท อุทฺธํ, น เหฏฺฐา, อมนุสฺสภาสิโต, โน มนุสฺสภาสิโต"ติ สลฺลกฺเขตฺวา โอหิตโสตา ปคฺคหิตมานสา หุตฺวา นิสีทิ, ตโต:-

@๔ สี.,อิ. ปุปฺผิตนฺติ มญฺญสิ, ฉ.ม. ปุปฺผิตนฺติ อญฺญาสิ

"อชฺช ปณฺณรโส อุโปสโถ (อิติ สาตาคิโร ยกฺโข)