@๔ ฉ.ม.,อิ. โส ปุตฺเต อามนฺเตสิ ๕ ฉ.ม. อยฺยา วุตฺตนฺ"ติ สพฺเพปิ เอกจิตฺตา หุตฺวา คนฺตฺวา ปิตรํ อทฺทสํสุ. ตทา ปิตา เตสํ ปสีทิตฺวา วรํ อทาสิ. เต "เตมาสํ ตถาคตํ ปฏิชคฺคิสฺสามา"ติ วรํ ยาจึสุ. ราชา "อยํ ทาตุํ น สกฺกา, อญฺญํ วรํ คณฺหถา"ติ อาห. ตาต อมฺหากํ อญฺเญน วเรน กิจฺจํ นตฺถิ, สเจ ตุเมฺห ทาตุกามา, เอตํเยว โน วรํ เทถาติ. ราชา เตสุ ปุนปฺปุนํ กเถนฺเตสุ อตฺตนา ปฏิญฺญาตตฺตา "น สกฺกา น ทาตุนฺ"ติ จินฺเตตฺวา อาห "ตาตา อหํ ตุมฺหากํ วรํ เทมิ, อปิจ โข ปน พุทฺธา นาม ทุราสทา โหนฺติ สีโห ๑- วิย เอกจรา, ทสพลํ ปฏิชคฺคนฺตา อปฺปมตฺตา ภเวยฺยาถา"ติ.

เต จินฺตยึสุ "อเมฺหหิ ตถาคตํ ปฏิชคฺคนฺเตหิ อนุจฺฉวิกํ กตฺวา ปฏิชคฺคิตุํ วฏฺฏตี"ติ สพฺเพปิ เอกจิตฺตา หุตฺวา ทสสีลานิ จ สมาทาย นิรามคนฺธา หุตฺวา สตฺถุ ทานคฺคปริคฺคาหณเก ๒- ตโย ปุริเส ฐปยึสุ. เตสุ เอโก ธนธญฺญุปฺปาทโก อโหสิ, เอโก มาปโก, เอโก ทานสํวิธายโก. เตสุ ธนธญฺญุปฺปาทโก ๓- ปจฺจุปฺปนฺเน พิมฺพิสารมหาราชา ชาโต, มาปโก วิสาโข อุปาสโก, ทานสํวิธายโก รฏฺฐปาลตฺเถโรติ. โส ตตฺถ ยาวชีวํ กุสลํ กตฺวา เทวปุเร นิพฺพตฺโต. อยํ ปน ราหุลตฺเถโร นาม กสฺสปทสพลกาเล กึกิสฺส รญฺโญ ๔- เชฏฺฐปุตฺโต หุตฺวา นิพฺพตฺติ, ปฐวินฺธรกุมาโรติสฺส นามํ อกํสุ. ตสฺส สตฺต ภคินิโย อเหสุํ. ตา ทสพลสฺส สตฺต ปริเวณานิ การยึสุ. ปฐวินฺธโร อุปรชฺชํ ลภิ. โส ตา ภคินิโย อาห "ตุเมฺหหิ การิตปริเวเณสุ มยฺหํปิ เอกํ เทถา"ติ. ภาติก ตุเมฺห อุปราชฏฺฐาเน ฐิตา, ตุเมฺหหิ นาม อมฺหากํ ทาตพฺพํ, ตุเมฺห อญฺญํ ปริเวณํ กโรถาติ. โส ตาสํ วจนํ สุตฺวา ปญฺจ วิหารสตานิ กาเรสิ. ปญฺจ ปริเวณสตานีติปิ วทนฺติ. โส ตตฺถ ยาวชีวํ กุสลํ กตฺวา เทวปุเร นิพฺพตฺติ. อิมสฺมึ ปน พุทฺธุปฺปาเท ปฐวินฺธรกุมาโร อมฺหากํ โพธิสตฺตสฺส อคฺคมเหสิยา กุจฺฉิสฺมึ ปฏิสนฺธึ คณฺหิ, ตสฺส สหายโก กุรุรฏฺเฐ ถุลฺลโกฏฺฐิตนิคเม รฏฺฐปาลเสฏฺฐิเคเห นิพฺพตฺติ.