สตฺถริ ปน กุรุรฏฺเฐ จาริกาย นิกฺขมิตฺวา ถุลฺลโกฏฺฐิตํ อนุปฺปตฺเต รฏฺฐปาโล กุลปุตฺโต สตฺถุ ธมฺมเทสนํ สุตฺวา ปฏิลทฺธสทฺโธ มาตาปิตโร อนุชานาเปตฺวา ทสพลํ อุปสงฺกมิตฺวา สตฺถุ อาณตฺติยา อญฺญตรสฺส เถรสฺส สนฺติเก ปพฺพชิ. ตสฺส ปพฺพชิตทิวสโต ปฏฺฐาย เสฏฺฐิคหปติ ภิกฺขู อตฺตโน นิเวสนทฺวาเร ๒- คจฺฉนฺเต ทิสฺวา "กึ ตุมฺหากํ อิมสฺมึ เคเห กมฺมํ, เอโกว ปุตฺตโก อโหสิ, ตํ คณฺหิตฺวา คตตฺถ, อิทานิ กึ กริสฺสถา"ติ อกฺโกสติ ปริภาสติ. สตฺถา อฑฺฒมาสํ ถุลฺลโกฏฺฐิเต วสิตฺวา ปุน สาวตฺถึเยว อคมาสิ. อถายสฺมา รฏฺฐปาโล โยนิโส มนสิกาเร ๓- กมฺมํ กตฺวา วิปสฺสนํ วฑฺเฒตฺวา อรหตฺตํ ปาปุณิ. โส สตฺถารํ อนุชานาเปตฺวา มาตาปิตโร ทสฺสนตฺถํ ถุลฺลโกฏฺฐิตํ คนฺตฺวา ตตฺถ สปทานจาริกํ ปิณฺฑาย วิจรนฺโต ปิตุ นิเวสเน อาภิโทสิกํ ปูติกุมฺมาสํ ๔- ลภิตฺวา ตํ อมตํ วิย ปริภุญฺชนฺโต ปิตรา นิมนฺติโต อธิวาเสตฺวา ทุติยทิวเส ปิตุ นิเวสเน ปิณฺฑปาตํ ปริภุญฺชิตฺวา อลงฺกตปฏิยตฺเต อิตฺถีชเน อสุภสญฺญํ อุปฺปาเทตฺวา ฐิตโกว ธมฺมํ เทเสตฺวา ชิยา มุตฺโต วิย นาราโจ ๕- อากาเส ๖- อุปฺปติตฺวา โกรพฺยสฺส รญฺโญ มิคาปรํ ๗- คนฺตฺวา มงฺคลสิลาปฏฺเฏ นิสินฺโน ทสฺสนตฺถาย อาคตสฺส รญฺโญ จตุปาริชุญฺญปฏิมณฺฑิตํ ธมฺมํ ๘- เทเสตฺวา อนุปุพฺเพน จาริกญฺจรมาโน ปุน สตฺถุ สนฺติกํเยว อาคโต. เอวเมตํ วตฺถุ สมุฏฺฐิตํ. อถ สตฺถา อปรภาเค อริยคณมชฺเฌ นิสินฺโน เถรํ อิมสฺมึ สาสเน สทฺธาปพฺพชิตานํ กุลปุตฺตานํ อคฺคฏฺฐาเน ฐเปสีติ.

@๔ ฉ.ม.,อิ. กุมฺมาสํ ๕ อิ. นาราโค ๖ ฉ.ม.,อิ. อากาสํ

@๗ สี. มิคาจีรํ, ม. มิคาชินํ, ฉ.,อิ. มิคจีรํ ๘ ม.ม. ๑๓/๓๐๔/๒๗๘ รฏฺฐปาลสุตฺต