อเถกทิวสํ เถโร ราชคหํ ปิณฺฑาย ปวิสนฺโต เอกํ ปุริสํ ปิปฺผลีนํ ปาตึ ๑- ปูเรตฺวา อาทาย อนฺโตนครํ ปวิสนฺตํ ทิสฺวา "กึ เต วสล ภาชเน"ติ อาห. โส จินฺเตสิ "อยํ หิ สมโณ มยา สทฺธึ ปาโตว ผรุสกถํ กเถติ, อิมสฺส อนุจฺฉวิกเมว วตฺตุํ วฏฺฏตี"ติ "มูสิกวจฺจํ เม ภนฺเต ภาชเน"ติ อาห. เอวํ ภวิสฺสติ วสลาติ. ตสฺส เถรสฺส ทสฺสนํ วิชหนฺตสฺส สพฺพํ มูสิกวจฺจเมว อโหสิ. โส จินฺเตสิ "อิมา ปิปฺผลิโย มูสิกวจฺจสทิสา ปญฺญายนฺติ, สภาโว นุ โข โน"ติ วีมํสนฺโต หตฺเถน อุปฺปีเฬสิ. อถสฺส อุนฺทูรวจฺจภาวํ ญตฺวา พลวโทมนสฺสํ อุปฺปชฺชิ. โส "อิมาเยว นุ โข เอวรูปา, อุทาหุ สกเฏปี"ติ คนฺตฺวา โอโลเกนฺโต สพฺพาปิ ปิปฺผลิโย ตาทิสาว ทิสฺวา หทยํ หตฺเถน สนฺธาเรตฺวา "อิทํ น อญฺญสฺส กมฺมํ, มยา ปาโตว ทิฏฺฐภิกฺขุสฺเสตํ กมฺมํ, อทฺธา เอกํ มายํ ภวิสฺสติ, ๒- ตสฺส คตฏฺฐานํ อนุวิชฺชิตฺวา เอกํ การณํ ชานิสฺสามี"ติ เถรสฺส คตมคฺคํ ปุจฺฉิตฺวา ปายาสิ.

อเถโก ปุริโส ตํ อติวิย จณฺฑิตํ ๓- คจฺฉนฺตํ ทิสฺวา "โภ ปุริส อติวิย จณฺฑิโต คจฺฉสิ, เกน กมฺเมน คจฺฉสี"ติ ปุจฺฉิ. โส ตสฺส ตํ ปวุตฺตึ อาโรเจสิ. โส ตสฺส ตํ กถํ สุตฺวา เอวมาห "โภ มา จินฺตยิ, มยฺหํ อยฺโย ปิลินฺทวจฺโฉ ภวิสฺสติ, ตฺวํ เอตเทว ภาชนํ ปูเรตฺวา อาทาย คนฺตฺวา เถรสฺส ปุรโต ติฏฺฐ. `กึ นาเมตํ วสลา'ติ วุตฺตกาเลปิ `ปิปฺผลิโย ภนฺเต'ติ วท, เถโร `เอวํ ภวิสฺสติ วสลา'ติ วกฺขติ. ปุน สพฺพา ปิปฺผลิโย ภวิสฺสนฺตี"ติ. โส ตถา อกาสิ. สพฺพา ปิปฺผลิโย ปฏิปากติกา อเหสุํ. อิทํ เอตฺตกํ วตฺถุํ. อปรภาเค ปน สตฺถา เทวตานํ ปิยมนาปกรณเมว วตฺถุํ กตฺวา เถรํ เทวตานํ ปิยมนาปานํ อคฺคฏฺฐาเน ฐเปสีติ.

พาหิยทารุจีริยตฺเถรวตฺถุ

[๒๑๖] อฏฺฐเม ขิปฺปาภิญฺญานนฺติ ขิปฺปํอธิคตาภิญฺญานํ ทารุจีริยตฺเถโร อคฺโคติ ทสฺเสติ. อยญฺหิ เถโร สงฺขิตฺตธมฺมเทสนาปริโยสาเน อรหตฺตํ ปาปุณิ,