เทสนาปริโยสาเน จตุราสีติปาณสหสฺสานิ อมตปานํ ปิวึสุ. อิทญฺจ ปน พาหิยตฺเถรสฺส วตฺถุ สุตฺเต ๓- อาคตตฺตา วิตฺถาเรน น กถิตํ. อปรภาเค ปน สตฺถา สํฆมชฺเฌ นิสินฺโน พาหิยตฺเถรํ ขิปฺปาภิญฺญานํ อคฺคฏฺฐาเน ฐเปสีติ.
กุมารกสฺสปตฺเถรวตฺถุ
[๒๑๗] นวเม จิตฺตกถิกานนฺติ วิจิตฺตํ กตฺวา ธมฺมํ กเถนฺตานํ. เถโร หิ ๔- เอกสฺสปิ ทฺวินฺนํปิ ธมฺมํ กเถนฺโต พหูหิ อุปมาหิ จ การเณหิ จ มณฺฑยิตฺวา โพเธนฺโต กเถสิ. ๕- ตสฺมา จิตฺตกถิกานํ อคฺโค นาม ชาโต.
ตสฺส ปญฺหากมฺเม อยมนุปุพฺพิกถา:- อยํ หิ ปทุมุตฺตรพุทฺธกาเล หํสวตีนคเร กุลเคเห ปฏิสนฺธึ คเหตฺวา ๖- วยปฺปตฺโต ทสพลสฺส ธมฺมกถํ สุณนฺโต สตฺถารํ เอกํ ภิกฺขุํ จิตฺตกถิกานํ อคฺคฏฺฐาเน ฐเปนฺตํ ทิสฺวา อธิการกมฺมํ กตฺวา ตํ ฐานนฺตรํ ปฏฺเฐตฺวา เทวมนุสฺเสสุ สํสรนฺโต กสฺสปพุทฺธสฺส สาสเน โอสกฺกนกาเล สตฺตนฺนํ ภิกฺขูนํ อพฺภนฺตโร หุตฺวา ปพฺพตมตฺถเก สมณธมฺมํ กตฺวา อปริหีนสีโล ตโต จุโต เทวโลเก นิพฺพตฺติตฺวา เอกํ พุทฺธนฺตรํ สมฺปตฺตึ อนุภวมาโน อมฺหากํ สตฺถุกาเล ราชคเห เอกิสฺสา กุลทาริกาย กุจฺฉิมฺหิ อุปฺปนฺโน. สา จ ปฐมํ มาตาปิตโร ยาจิตฺวา ปพฺพชฺชํ อลภมานา กุลฆรํ คตา คพฺภํ คณฺหิ. ตํปิ ๗- อชานนฺตี สามิกํ อาโรเจตฺวา ๘- เตน อนุญฺญาตา ภิกฺขุนีสุ ปพฺพชิ. ๙- ตสฺสา คพฺภนิมิตฺตํ ทิสฺวา