@๘ ที.ม. ๑๐/๓๓๑/๒๑๖ ๙ ฉ.ม. ราชปุตฺตภาเว

เตน สมเยน สตฺถา "ภิกฺขู ภิกฺขุนิโย โอวทนฺตู"ติ อาห. เถโร อตฺตโน วาเร สมฺปตฺเต ตาสํ ปุริมภเว อตฺตโน ปาทปริจาริกภาวํ ญตฺวา จินฺเตสิ "มํ อิมสฺส ภิกฺขุนีสํฆสฺส มชฺเฌ นิสินฺนํ อุปมาโย จ การณาทีนิ จ อาหริตฺวา ธมฺมํ กถยมานํ ทิสฺวา อญฺโญ ปุพฺเพนิวาสญาณลาภี ภิกฺขุ ๑- อิมํ การณํ โอโลเกตฺวา `อายสฺมา นนฺทโก ยาวชฺชทิวสา โอโรเธ น วิสฺสชฺเชติ, โสภตายสฺมา โอโรธปริวุโต'ติ วตฺตพฺพํ มญฺเญยฺยา"ติ. ตสฺมา สยํ อคนฺตฺวา อญฺญํ ภิกฺขุํ เปเสสิ. ตา ปน ปญฺจสตา ภิกฺขุนิโย เถรสฺส โอวาทํ ปจฺจาสึสนฺติ. อิมินา การเณน ภควา "อตฺตโน วาเร สมฺปตฺเต อญฺญํ อเปเสตฺวา สยเมว คนฺตฺวา ภิกฺขุนีสํฆํ โอวทาหี"ติ เถรํ อาห. โส สตฺถุ กถํ ปฏิพาหิตุํ อสกฺโกนฺโต อตฺตโน วาเร สมฺปตฺเต จาตุทฺทเส ภิกฺขุนีสํเฆ ๒- โอวาทํ ทตฺวา สพฺพาว ตา ภิกฺขุนิโย สฬายตนปฏิมณฺฑิตาย ธมฺมเทสนาย ๓- โสตาปตฺติผเล ปติฏฺฐาเปสิ.

ตา ภิกฺขุนิโย เถรสฺส ธมฺมเทสนาย อตฺตมนา หุตฺวา สตฺถุ สนฺติกํ คนฺตฺวา อตฺตโน ปฏิวิทฺธคุณํ อาโรเจสุํ. สตฺถา "กสฺมึ นุ โข ธมฺมํ เทเสนฺเต อิมา ภิกฺขุนิโย อุปริมคฺคผลานิ ปาปุเณยฺยุนฺ"ติ อาวชฺเชนฺโต ปุน "เอตํ ๔- นนฺทกสฺส ธมฺมเทสนํ สุตฺวา ปญฺจสตาปิ เอตา อรหตฺตํ ปาปุณิสฺสนฺตี"ติ ทิสฺวา ปุนทิวเสปิ เถรสฺเสว สนฺติเก ๕- ธมฺมสฺสวนตฺถาย เปเสสิ. ตา ปุนทิวเส ธมฺมํ สุตฺวา สพฺพาว อรหตฺตํ ปตฺตา. ตํทิวสํ ภควา ตาสํ ภิกฺขุนีนํ อตฺตโน สนฺติกํ อาคตกาเล ธมฺมเทสนาย สผลภาวํ ญตฺวา "หิยฺโย นนฺทกสฺส ธมฺมเทสนา จาตุทฺทสิยํ จนฺทสทิสี อโหสิ, อชฺช ปนฺนรสิยํ จนฺทสทิสี"ติ วตฺวา ตเทว การณํ อตฺถุปฺปตฺตึ กตฺวา เถรํ ภิกฺขุโนวาทกานํ อคฺคฏฺฐาเน ฐเปสีติ.