@น ทิสฺสติ ๑๕ ฉ.ม.,อิ. คนฺตฺวา จ ๑๖ ฉ.ม.,อิ. กหาปณํ พหูหิ กหาปเณหิ อตฺโถ, ตว เอตฺตกํ ทานํ เทนฺตสฺส ๑- น สกฺกา กหาปเณหิ วินา ภวิตุํ, มยฺหํ ปญฺจ กหาปณสตานิ เทหีติ. พฺราหฺมณ ปญฺจสตานิ นตฺถิ, ปุน กาเล สมฺปตฺเต ลภิสฺสสีติ. กึ ปนาหํ ตว ทานกาเล อาคมิสฺสามีติ พาวริพฺราหฺมณสฺส ปณฺณสาลทฺวาเร วาลิกํ ๒- ถูปํ กตฺวา สมนฺตโต รตฺตวณฺณานิ ปุปฺผานิ วิกิริตฺวา มนฺตํ ชปฺเปนฺโต วิย โอฏฺเฐหิ ๓- จาเลตฺวา จาเลตฺวา "มุทฺธา ผลตุ สตฺตธา"ติ วทติ.

พาวริพฺราหฺมโณ จินฺเตสิ "อยํ มหาตโป ตปจารํ คณฺหิตฺวา จรณกพฺราหฺมโณ มยฺหํ สตฺตทิวสมตฺถเก `สตฺตธา มุทฺธา ผลตู'ติ ๔- วทติ, มยฺหญฺจ อิมสฺส ทาตพฺพานิ ปญฺจ กหาปณสตานิ นตฺถิ, เอกํเสน มํ เอส ฆาเตสฺสตี"ติ. เอวํ ตสฺมึ โสกสลฺลสมปฺปิเต นิสินฺเน รตฺติภาคสมนนฺตเร อนนฺตรตฺตภาเว พาวริสฺส มาตา เทวตา หุตฺวา นิพฺพตฺติ. ๕- สา ปุตฺตสฺส โสกสลฺลสมปฺปิตภาวํ ทิสฺวา อาคนฺตฺวา อาห "ตาต เอส มุทฺธผาลภาวํ วา อมุทฺธผาลภาวํ วาปิ ๖- น ชานาติ, ตฺวํ โลเก พุทฺธานํ อุปฺปนฺนภาวํ น ชานาสิ. สเจ เต สํสโย อตฺถิ, สตฺถุ สนฺติกํ คนฺตฺวา ปุจฺฉ, โส เต เอตํ การณํ กเถสฺสตี"ติ. พฺราหฺมโณ เทวตาย กถํ สุตกาลโต ปฏฺฐาย อสฺสาสํ ลภิตฺวา ปุนทิวเส อุฏฺฐิเต อรุเณ สพฺเพว อนฺเตวาสิเก ปกฺโกสาเปตฺวา ๗- "ตาตา พุทฺโธ กิร โลเก อุปฺปนฺโน, ตุเมฺหปิ สีฆํ คนฺตฺวา `พุทฺโธ วา โน วา'ติ ญตฺวา อาคนฺตฺวา มยฺหํ อาโรเจถ, อหํ สตฺถุ สนฺติกํ คมิสฺสามิ. อปิจ โข ปน มยฺหํ มหลฺลกภาเวน ชีวิตนฺตราโย ทุชฺชาโน, ตุเมฺห ตสฺส สนฺติกํ คนฺตฺวา อิมินา จ อิมินา จ นิยาเมน ปเญฺห นํ ปุจฺฉถา"ติ มุทฺธผาลนปญฺหํ นาม อภิสงฺขริตฺวา อทาสิ.

ตโต จินฺเตสิ "สพฺเพ อิเม มาณวา ปณฺฑิตา, สตฺถุ ธมฺมกถํ สุตฺวา อตฺตโน กิจฺเจ มตฺถกํ ปตฺเต ปุน มยฺหํ สนฺติกํ อาคจฺเฉยฺยุํ วา โน วา"ติ.