เอวํ อุปสมฺปนฺนา ปน มหาปชาปตี สตฺถารํ อุปสงฺกมิตฺวา อภิวาเทตฺวา เอกมนฺตํ อฏฺฐาสิ, อถสฺสา สตฺถา ธมฺมํ เทเสสิ. สา สตฺถุ สนฺติเกว กมฺมฏฺฐานํ คเหตฺวา อรหตฺตํ ปาปุณิ. เสสา ปญฺจสตา ภิกฺขุนิโย นนฺทโกวาทสุตฺตปริโยสาเน ๔- อรหตฺตํ ปาปุณึสุ. เอวเมตํ วตฺถุ สมุฏฺฐิตํ. อปรภาเค สตฺถา เชตวเน นิสินฺโน ภิกฺขุนิโย ฐานนฺตเรสุ ฐเปนฺโต มหาปชาปตึ รตฺตญฺญูนํ อคฺคฏฺฐาเน ฐเปสีติ.

เขมาเถรีวตฺถุ

[๒๓๖] ทุติเย เขมาติ เอวํนามิกา ภิกฺขุนี. อิโต ปฏฺฐาย จ ปนสฺสา ปญฺหากมฺเม อยมนุปุพฺพิกถาติ อวตฺวา สพฺพตฺถ อภินีหารํ อาทึ กตฺวา วตฺตพฺพเมว วกฺขาม.