@๓ วิ.จุ. ๗/๔๐๒/๒๓๑ ภิกฺขุนิกฺขนฺธก ๔ ม.อุ. ๑๔/๓๙๘/๓๔๔ สฬายตนวคฺค

อตีเต กิร ปทุมุตฺตรพุทฺธกาเล หํสวตีนคเร อยํ ปรปริยาปนฺนา หุตฺวา นิพฺพตฺติ. อเถกทิวสํ ตสฺส ภควโต อคฺคสาวิกํ สุชาตตฺเถรึ นาม ปิณฺฑาย จรนฺตึ ทิสฺวา ตโย โมทเก ทตฺวา ตํทิวสเมว อตฺตโน เคเห ๑- วิสฺสชฺเชตฺวา เถริยา ทานํ ทตฺวา "อนาคเต พุทฺธุปฺปาเท ตุเมฺห วิย มหาปญฺญา ภเวยฺยนฺ"ติ ปฏฺฐนํ กตฺวา ยาวชีวํ กุสลกมฺเมสุ ๒- อปฺปมตฺตา หุตฺวา กปฺปสตสหสฺสํ เทวมนุสฺเสสุ สํสรนฺตี ๓- กสฺสปพุทฺธกาเล กึกิสฺส รญฺโญ ๔- เคเห ปฏิสนฺธึ คเหตฺวา สตฺตนฺนํ ภคินีนํ อพฺภนฺตรา หุตฺวา วีสติ วสฺสสหสฺสานิ เคเหเยว โกมาริพฺรหฺมจริยํ จริตฺวา ตาหิ ภคินีหิ สทฺธึ ทสพลสฺส วสนปริเวณํ กาเรตฺวา เอกํ พุทฺธนฺตรํ เทวมนุสฺเสสุ สํสรนฺตี อิมสฺมึ พุทฺธุปฺปาเท มทฺทรฏฺเฐ สาคลนคเร ราชกุเล ปฏิสนฺธึ คณฺหิ, เขมาติสฺสา นามํ อกํสุ. ตสฺสา สรีรวณฺโณ สุวณฺณรสปิญฺชโร วิย อโหสิ. สา ปน วยปฺปตฺตา พิมฺพิสารรญฺโญ เคหํ อคมาสิ.

สา ตถาคเต ราชคหํ อุปนิสฺสาย เวฬุวเน วิหรนฺเต "สตฺถา กิร รูเป โทสํ ทสฺเสตี"ติ รูปมทมตฺตา หุตฺวา "มยฺหํปิ รูเป โทสํ ทสฺเสยฺยา"ติ ภเยน ทสพลสฺส ทสฺสนาย น คจฺฉติ. ราชา จินฺเตสิ "อหํ สตฺถุ อคฺคุปฏฺฐาโก, มาทิสสฺส จ นาม อริยสาวกสฺส อคฺคมเหสี ทสพลํ ทสฺสนาย น คจฺฉติ, น เม เอตํ รุจฺจตี"ติ. โส กวีหิ เวฬุวนุยฺยานสฺส วณฺณํ ๕- พนฺธาเปตฺวา "เขมาย เทวิยา สวนุปจาเร คายถา"ติ อาห. สา อุยฺยานสฺส วณฺณํ สุตฺวา คนฺตุกามา หุตฺวา ราชานํ ปฏิปุจฺฉิ. ราชา "อุยฺยานํ คจฺฉ, สตฺถารํ ปน อทิสฺวา อาคนฺตุํ น ลภิสฺสสี"ติ อาห. สา รญฺโญ ปฏิวจนํ อทตฺวาว มคฺคํ ปฏิปชฺชิ. ราชา ตาย สทฺธึ คจฺฉนฺเต ปุริเส อาห "สเจ เทวี อุยฺยานโต นิวตฺตมานา ทสพลํ ปสฺสติ, อิจฺเจตํ กุสลํ. สเจ น ปสฺสติ, ราชาณาย นํ ทสฺเสถา"ติ. อถโข สา เทวี ทิวสภาคํ อุยฺยาเน จริตฺวา นิวตฺตนฺตี ทสพลํ อทิสฺวาว คนฺตุํ อารทฺธา. อถ นํ ราชปุริสา อตฺตโน อรุจิยา เทวึ สตฺถุ สนฺติกํ นยึสุ.