ปทุมวตีปิ โข สญฺญํ ลภิตฺวา ตํ อุปฏฺฐายิกํ "กึ วิชาตมฺหิ อมฺมา"ติ ปุจฺฉิ. สา ตํ สนฺตชฺเชตฺวา "กุโต ตฺวํ ทารกํ ลภิสฺสสี"ติ วตฺวา "อยนฺเต กุจฺฉิโต นิกฺขนฺตทารโก"ติ โลหิตมกฺขิตํ ทารุฆฏิกํ ปุรโต ฐเปสิ. สา ตํ ทิสฺวา โทมนสฺสปฺปตฺตา "สีฆํ นํ ผาเลตฺวา อปเนหิ, สเจ โกจิ ปสฺเสยฺย, ลชฺชิตพฺพํ ภเวยฺยา"ติ อาห. สา ตสฺสา กถํ สุตฺวา อตฺถกามา วิย ทารุฆฏิกํ ผาเลตฺวา อุทฺธเน ปกฺขิปิ.

ราชาปิ ปจฺจนฺตโต อาคนฺตฺวา นกฺขตฺตํ ปฏิมาเนนฺโต พหินคเร ขนฺธาวารํ พนฺธิตฺวา ๒- นิสีทิ. อถ ตา ปญฺจสตา อิตฺถิโย รญฺโญ ปจฺจุคฺคมนํ อาคนฺตฺวา อาหํสุ "ตฺวํ มหาราช อมฺหากํ น สทฺทหสิ, อเมฺหหิ วุตฺตํ อการณํ วิย โหติ. ตฺวํ มเหสิยา อุปฏฺฐายิกํ ปกฺโกสาเปตฺวา ปฏิปุจฺฉ, ทารุฆฏิกํ โข ๓- เทวี วิชาตา"ติ. ราชา ตํ การณํ น อุปปริกฺขิตฺวาว "อมนุสฺสชาติกา จ ๔- ภวิสฺสตี"ติ ตํ เคหโต นิกฺกฑฺฒิ. ตสฺสา ราชเคหโต สห นิกฺขมเนเนว ปทุมปุปฺผานิ อนฺตรธายึสุ, สรีรญฺจ วิวณฺณํ ๕- อโหสิ. สา เอกิกาว อนฺตรวีถิยา ปายาสิ. อถ นํ เอกา วยปฺปตฺตา มหลฺลิกา อิตฺถี ทิสฺวา ธีตุสิเนหํ อุปฺปาเทตฺวา "กหํ คจฺฉสิ อมฺมา"ติ อาห. อาคนฺตุกมฺหิ, วสนฏฺฐานํ โอโลเกนฺตี วิจรามีติ. อิธาคจฺฉ อมฺมาติ วสนฏฺฐานํ ทตฺวา โภชนํ ปฏิยาเทสิ.

ตสฺสา อิมินา นิยาเมน ตตฺถ วสมานาย ตา ปญฺจสตา อิตฺถิโย เอกจิตฺตา หุตฺวา ราชานํ อาหํสุ "มหาราช ตุเมฺหสุ ขนฺธาวารํ ๖- คเตสุ อเมฺหหิ คงฺคาเทวตาย `อมฺหากํ เทเว วิชิตสงฺคาเม อาคเต พลิกมฺมํ กตฺวา อุทกกีฬํ กริสฺสามา'ติ ปฏฺฐิตํ อตฺถิ, เอตมตฺถํ เทว ชานาเปมา"ติ. ราชา ตาสํ วจเนน ตุฏฺโฐ คงฺคาย อุทกกีฬํ