อถ อปรภาเค เตสํ กุมารานํ กีฬนกาเล สมฺปตฺเต ราชา อุยฺยาเน นานาวิธํ กีฬนฏฺฐานํ กาเรสิ. เต อตฺตโน โสฬสวสฺสุทฺเทสิกกาเล สพฺเพว เอกโต หุตฺวา อุยฺยาเน ปทุมสญฺฉนฺนาย มงฺคลโปกฺขรณิยา กีฬนฺตา นวปทุมานิ ปุปฺผิตานิ ปุราณปทุมานิ จ วณฺฏโต ปตนฺตานิ ทิสฺวา "อิมสฺส ตาว อนุปาทินฺนกสฺส เอวรูปา ชรา ปาปุณาติ, กิมงฺคํ ปน อมฺหากํ สรีรสฺส. อิทํปิ หิ เอวํคติกเมว ภวิสฺสตี"ติ อารมฺมณํ คเหตฺวา สพฺเพว ปจฺเจกพุทฺธญาณํ นิพฺพตฺเตตฺวา อุฏฺฐายุฏฺฐาย ปทุมกณฺณิกาสุ ปลฺลงฺเกน นิสีทึสุ.
อถ เตหิ สทฺธึ อาคตปุริสา ๑- พหุตรํ ทิวสํ ญตฺวา "อยฺยปุตฺตา ตุมฺหากํ เวลํ ชานาถา"ติ อาหํสุ. เต สพฺเพ ๒- ตุณฺหี อเหสุํ. เต ปุริสา คนฺตฺวา รญฺโญ อาโรเจสุํ "กุมารา เทว ปทุมกณฺณิกาสุ นิสินฺนา, อเมฺหสุ กเถนฺเตสุปิ วจีเภทํ น กโรนฺตี"ติ. ยถารุจิยา เตสํ นิสีทิตุํ เทถาติ. เต สพฺพรตฺตึ คหิตารกฺขา ปทุมกณฺณิกาสุ นิสินฺนนิยาเมเนว อรุณํ อุฏฺฐาเปสุํ. ปุริสา คนฺตฺวา ๓- ปุนทิวเส อุปสงฺกมิตฺวา "เทวา เวลา ชานาถา"ติ. น มยํ เทวา, ปจฺเจกพุทฺธา นาม มยนฺติ. อยฺยา ตุเมฺห ภาริยํ กถํ กเถถ, ปจฺเจกพุทฺธา นาม ตุมฺหาทิสา น โหนฺติ, ทฺวงฺคุลิเกสมสฺสุธรา ๔- กาเย ปฏิมุกฺกอฏฺฐปริกฺขารา โหนฺตีติ. เต ทกฺขิณหตฺเถน สีสํ ปรามสึสุ, ตาวเทว คิหิลิงฺคํ อนฺตรธายิ, อฏฺฐปริกฺขารา กายปฏิมุกฺกาว อเหสุํ. ตโต ปสฺสนฺตสฺเสว มหาชนสฺส อากาเสเนว นนฺทมูลกปพฺภารํ อคมํสุ.
สาปิ โข ปทุมวตี เทวี "อหํ พหุปุตฺตา หุตฺวา วิยุตฺตา ชาตา"ติ หทยโสกํ ๕- ปตฺวา เตเนว โรเคน ๖- กาลํ กตฺวา ราชคหนครทฺวารคามเก สหตฺเถน กมฺมํ กตฺวา ชีวกฏฺฐาเน นิพฺพตฺติ. อปรภาเค กุลฆรํ คนฺตฺวา เอกทิวสํ สามิกสฺส เขตฺเต ๗- ยาคุํ หรมานา เตสํ อตฺตโน ปุตฺตานํ อนฺตเร อฏฺฐ ปจฺเจกพุทฺเธ ภิกฺขาจารเวลาย อากาเสน คจฺฉนฺเต ทิสฺวา สีฆํ สีฆํ คนฺตฺวา สามิกสฺส อาโรเจสิ "ปสฺสถ ๘-