สา อมฺหากํ ทสพเล สพฺพญฺญุตํ ปตฺวา อนุปุพฺเพน กปิลวตฺถุํ อาคนฺตฺวา นนฺทญฺจ ราหุลญฺจ ปพฺพาเชตฺวา ปกฺกนฺเต สุทฺโธทนมหาราชสฺส ปรินิพฺพุตกาเล "มหาปชาปตี โคตมี ราหุลมาตา จ นิกฺขมิตฺวา สตฺถุ สนฺติเก ปพฺพชิตา"ติ ญตฺวา "อิมาสํ ปพฺพชิตกาลโต ปฏฺฐาย มยฺหํ อิธ กึ กมฺมนฺ"ติ มาตุ มหาปชาปติยา สนฺติกํ คนฺตฺวา ปพฺพชิ. ปพฺพชิตทิวสโต ปฏฺฐาย "สตฺถา รูปํ ครหี"ติ สตฺถุ อุปฏฺฐานํ น คจฺฉติ, โอวาทวาเร สมฺปตฺเต อญฺญํ เปเสตฺวา โอวาทํ อาหราเปสิ. ๓- สตฺถา ตสฺสา รูปมทมตฺตเมว ๔- ญตฺวา "อตฺตโน โอวาทํ อตฺตนาว อาคนฺตฺวา คณฺหนฺตุ, น ภิกฺขุนีหิ อญฺญา เปเสตพฺพา"ติ อาห. ตโต รูปนนฺทา อญฺญํ มคฺคํ อปสฺสนฺตี อกามา โอวาทํ อคมาสิ.

สตฺถา ตสฺสา จริตวเสน อิทฺธิยา เอกํ อิตฺถีรูปํ นิมฺมินิตฺวา ตาลปณฺณํ ๕- คเหตฺวา วีชมานํ วิย อกาสิ. รูปนนฺทา ตํ ทิสฺวา จินฺเตสิ "อหํ อการเณเนว ปมตฺตา หุตฺวา นาคจฺฉามิ, เอวรูปาปิ อิตฺถิโย สตฺถุ สนฺติเก วิสฺสฏฺฐา วิจรนฺติ. มม รูปํ เอตาสํ รูปสฺส กลฺลํ นาคฺฆติ โสฬสึ, อชานิตฺวาว เอตฺตกํ กาลํ น อาคตมฺหี"ติ ตเมว อิตฺถีนิมิตฺตํ คณฺหิตฺวา โอโลเกนฺตี อฏฺฐาสิ. สตฺถา ตสฺสา ปุพฺพเหตุสมฺปนฺนตาย ๖- "อฏฺฐีนํ นครํ กตนฺ"ติ ๗- ธมฺมปเท คาถํ วตฺวา:-

"จรํ วา ยทิ วา ติฏฺฐํ นิสินฺโน อุท วา สยนฺ"ติ ๘-