สาปิ ๓- ปทุมุตฺตรพุทฺธกาเล หํสวติยํ กุลเคเห ปฏิสนฺธึ คเหตฺวา อปรภาเค สตฺถุ ธมฺมกถํ สุณนฺตี สตฺถารํ เอกํ ภิกฺขุนึ มหาภิญฺญาปฺปตฺตานํ อคฺคฏฺฐาเน ฐเปนฺตํ ทิสฺวา อธิการกมฺมํ กตฺวา ตํ ฐานนฺตรํ ปฏฺเฐสิ. สา กปฺปสตสหสฺสํ เทวมนุสฺเสสุ สํสริตฺวา อิมสฺมึ พุทฺธุปฺปาเท สุปฺปพุทฺธสฺส ๔- เคเห ปฏิสนฺธึ คณฺหิ, ภทฺทากจฺจานาติสฺสา นามํ อกํสุ.

สา วยปฺปตฺตา โพธิสตฺตสฺส เคหํ อคมาสิ. สา อปรภาเค ราหุลกุมารํ นาม ปุตฺตํ วิชายิ. ตสฺส ชาตทิวเส โพธิสตฺโต นิกฺขมิตฺวา โพธิมณฺเฑ สพฺพญฺญุตํ ปตฺวา โลกานุคฺคหํ กโรนฺโต อนุปุพฺเพน กปิลวตฺถุํ อาคมฺม ญาตีนํ สงฺคหํ อกาสิ. อปรภาเค ปรินิพฺพุเต สุทฺโธทนมหาราเช มหาปชาปตีโคตมี ปญฺจหิ มาตุคามสเตหิ สทฺธึ สตฺถุ สนฺติเก ปพฺพชิ. ราหุลมาตาปิ ชนปทกลฺยาณีปิ เถริยา สนฺติกํ คนฺตฺวา ปพฺพชิ. สา ปพฺพชิตกาลโต ปฏฺฐาย ภทฺทากจฺจานา เถรีเตฺวว ปากฏา อโหสิ, สา อปรภาเค วิปสฺสนํ วฑฺเฒตฺวา อรหตฺตํ ปตฺวา อภิญฺญาสุ จิณฺณวสี อโหสิ. เอกปลฺลงฺเก นิสินฺนา เอกาวชฺชเนน กปฺปสตสหสฺสาธิกํ เอกํ อสงฺเขฺยยฺยํ อนุสฺสรติ. ตสฺสา ตสฺมึ คุเณ ปากเฏ ชาเต สตฺถา เชตวเน นิสินฺโน ภิกฺขุนิโย ปฏิปาฏิยา ฐานนฺตเรสุ ฐเปนฺโต อิมํ เถรึ มหาภิญฺญาปฺปตฺตานํ อคฺคฏฺฐาเน ฐเปสีติ.

กิสาโคตมีเถรีวตฺถุ