@๕ สี.,อิ.,ฉ.ม. นิตฺถรเณน ๖ ฉ.ม. สมานตฺตฏฺฐาเนน ๗ ฉ.ม.,อิ. สกฺยราชกุเล

@๘ สี.,อิ. ปฐมกทสฺสเนเยว ปฏิชคฺคนปฏิญฺญํ เทถ, อหํ ภิกฺขุสํฆสฺส สรีเร โอชํ ปเวเสสฺสามี"ติ. สตฺถา อธิวาเสสิ. โส สตฺถุ อธิวาสนํ วิทิตฺวา ปุนทิวสโต ปฏฺฐาย พุทฺธปฺปมุขํ ภิกฺขุสํฆํ ปณีตโภชนียจตุมธุราทีหิ ๑- ปฏิชคฺคิตฺวา ปุน จตุมาสํ ปฏิญฺญํ คเหตฺวา อฏฺฐมาเส ปูเรตฺวา ปุน จตุมาสํ ปฏิญฺญํ คเหตฺวา สกลสํวจฺฉรํ ปฏิชคฺคิ. สตฺถา ตโต ปรํ ปฏิญฺญํ นาทาสิ. มหานาโม ปน ตโต ปฏฺฐาย อปราปรํ สมฺปตฺตภิกฺขุสํฆสฺส เตเนว นิยาเมน สกฺการํ กโรติ, ตสฺส โส คุโณ สกลชมฺพูทีเป ปากโฏ ชาโต. เอวเมตํ วตฺถุ สมุฏฺฐิตํ. สตฺถา ปน อปรภาเค เชตวเน นิสีทิตฺวา มหานามํ สกฺกํ ปณีตทายกานํ อคฺคฏฺฐาเน ฐเปสีติ.

อุคฺคคหปติวตฺถุ

[๒๕๓] ฉฏฺเฐ มนาปทายกานนฺติ มนาปจิตฺตรุจิตโภชนทายกานํ อุคฺโค คหปติ เวสาลิโก อคฺโคติ ทสฺเสติ. โส กิร ปทุมุตฺตรพุทฺธกาเล หํสวติยํ กุลเคเห นิพฺพตฺโต อปรภาเค สตฺถุ ธมฺมกถํ สุณนฺโต สตฺถารํ เอกํ อุปาสกํ มนาปทายกานํ อคฺคฏฺฐาเน ฐเปนฺตํ ทิสฺวา อธิการกมฺมํ กตฺวา ตํ ฐานนฺตรํ ปฏฺเฐสิ. โส กปฺปสตสหสฺสํ เทวมนุสฺเสสุ สํสริตฺวา อิมสฺมึ พุทฺธุปฺปาเท เวสาลิยํ เสฏฺฐิกุเล นิพฺพตฺติ. ตสฺส ชาตกาเล นามํ อนิยามิตํ. อปรภาเค ปนสฺส อตฺตภาโวปิ อุคฺคโต อโหสิ สมิทฺโธ, อลงฺกตโตรณํ วิย อุสฺสิตจิตฺตปโฏ วิย จ อติวิโรจิตฺถ. คุณาปิสฺส อุคฺคตา อเหสุํ. โส อิเมสํ ทฺวินฺนํปิ อุคฺคตตฺตา อุคฺคเสฏฺฐีเตฺวว สงฺขํ คโต. โส ปนายํ ทสพลสฺส ปฐมทสฺสเนเนว โสตาปตฺติผเล ปติฏฺฐาย อปรภาเค ตีณิปิ มคฺคผลานิ สจฺฉากาสิ. โส อตฺตโน มหลฺลกกาเล รโหคโต นิสีทิตฺวา จินฺเตสิ "ยํ ยํ มยฺหํ ปิยํ มนาปํ, ตํ ตเทว ทสพลสฺส ทสฺสามิ, อิทํ เม สตฺถุ สมฺมุขาปิ ๒- สุตํ `มนาปทายี ลภเต มนาปนฺ"ติ. อถสฺส เอตทโหสิ "อปิ นุ โข เม จิตฺตํ ชานิตฺวา สตฺถา นิเวสนทฺวารํ อาคจฺเฉยฺยา"ติ.