[๒๕๗] ทสเม วิสฺสาสกานนฺติ วิสฺสาสกํ กถํ กเถนฺตานํ อุปาสกานํ อนฺตเร นกุลปิตา คหปติ อคฺโคติ ทสฺเสติ. โส กิร ปทุมุตฺตรพุทฺธกาเล หํสวติยํ กุลเคเห นิพฺพตฺโต สตฺถุ ธมฺมเทสนํ สุณนฺโต สตฺถารํ เอกํ อุปาสกํ วิสฺสาสกานํ อคฺคฏฺฐาเน ฐเปนฺตํ ทิสฺวา อธิการกมฺมํ กตฺวา ตํ ฐานนฺตรํ ปฏฺเฐสิ. โส กปฺปสตสหสฺสํ เทวมนุสฺเสสุ สํสริตฺวา อิมสฺมึ พุทฺธุปฺปาเท ภคฺครฏฺเฐ สุํสุมารคิรินคเร ๑- เสฏฺฐิกุเล นิพฺพตฺติ. สตฺถาปิ โข ภิกฺขุสํฆปริวุโต จาริกญฺจรมาโน ตํ นครํ ปตฺวา เภสกลาวเน วิหรติ. อถายํ นกุลปิตา คหปติ สุํสุมารคิริวาสีหิ สทฺธึ สตฺถุ สนฺติกํ คนฺตฺวา ปฐมทสฺสเนเนว โส จ ภริยา จ ทสพลํ "อยํ อมฺหากํ ปุตฺโต"ติ สญฺญํ ปติฏฺฐเปตฺวา อุโภปิ สตฺถุ ปาเทสุ ปติตฺวา "ตาต ตฺวํ เอตฺตกํ กาลํ อเมฺห ฉฑฺเฑตฺวา กหํ วิจรสี"ติ อาหํสุ. อยํ กิร นกุลปิตา คหปติ ปุพฺเพปิ ปญฺจ ชาติสตานิ ทสพลสฺส ปิตา อโหสิ, ปญฺจ ชาติสตานิ จุลฺลปิตา, ปญฺจ ชาติสตานิ มหาปิตา, ปญฺจ ชาติสตานิ มาตุโล, นกุลมาตาปิ ปญฺจ ชาติสตานิ มาตา อโหสิ, ปญฺจ ชาติสตานิ จูฬมาตา, ปญฺจ ชาติสตานิ มหามาตา, ปญฺจ ชาติสตานิ ปิตุจฺฉา. อิติ ทีฆรตฺตํ อนุคตสิเนหตฺตา ทสพลํ ทิสฺวาว "ปุตฺโต"ติ สญฺญํ กตฺวา สณฺฐาตุํ นาสกฺขึสุ. สตฺถา ยาว เตสํ จิตฺตํ สญฺญตฺตึ นาคจฺฉติ, ตาว "อเปถา"ติ นาโวจ. อถ เนสํ ยถามเนเนว สตึ ปฏิลภิตฺวา มชฺฌตฺตภูตานํ อาสยํ ญตฺวา ธมฺมํ เทเสสิ. เทสนาปริโยสาเน อุโภปิ โสตาปตฺติผเล ปติฏฺฐหึสุ.

สตฺถา อปรภาเค เตสํ มหลฺลกกาเล ปุน ตํ ภคฺคนครํ อคมาสิ. เต "สตฺถา อาคโต"ติ สุตฺวา สตฺถุ สนฺติกํ คนฺตฺวา ปญฺจปติฏฺฐิเตน วนฺทิตฺวา สฺวาตนาย นิมนฺเตตฺวา ปุนทิวเส อตฺตโน นิเวสเน พุทฺธปฺปมุขํ ภิกฺขุสํฆํ นานคฺครเสหิ โภชเนหิ ปริวิสิตฺวา สตฺถารํ กตภตฺตกิจฺจํ อุปสงฺกมิตฺวา เอกมนฺตํ นิสีทึสุ. เอกมนฺตํ นิสินฺโน